Wou gëtt wéini de Wanter verbrannt?

Et ass natierlech och déi perfekt Geleeënheet, seng Noperen an aner Leit aus dem Uert mol nees ze gesinn oder lokal Perséinlechkeeten a Veräiner ze treffen.

Um Wupp vun dësem Artikel fannt Dir eng Oplëschtung vun de Buergbrennen uechter d'Land.

All Duerf organiséiert u sech een eegent - oder och e puer - Mol méi grouss, Mol méi kleng Buergbrennen. Dacks ginn dofir schonn am Virfeld Holz, Stréi a Gehecks gesammelt - eis al Chrëschtbeemercher zum Beispill - fir op enger grousser oppener Plaz als Zort "Scheiterhaufen" mat engem Kräiz oder enger Buerg verbrannt ze ginn.

Dacks gëtt och e Fakelzuch duerch déi verschidden Uertschaften organiséiert, woubäi d'Fakelen de Koup duerno a Brand setzen. Et ass awer och nach ëmmer Brauch - wann och net méi iwwerall - dass déi fir d'lescht bestuete Koppel oder eng lokal Perséinlechkeet d'Buerg ufänkt.

An der Zäit war d'Buergbrennen exklusiv op "Buergsonndeg", ma mëttlerweil hu vill lokal Veräiner dëse Rendezvous och schonn op Samschdeg, oder souguer op Freideg verluecht, wat organisatoresch besser ze geréieren ass. A ville Gemenge sinn et Veräiner wéi zum Beispill d'Scouten, déi sech engagéieren, sou dass och déi méi kleng eppes vun der Traditioun hunn.

Eng al Traditioun

Zesumme gëtt d'Keelt verjot a symbolesch de Wanter verbrannt. Dat awer net just hei am Land. Och am däitsche Grenzgebitt an op verschiddene Plazen am Frankräich ass de Brauch e Kräiz ze verbrennen e feste Bestanddeel. Am schwäbesch-alemannesche Raum heescht eist d'Buergbrennen zum Beispill "Funkenfeuer", zu Zürich an der Schwäiz gëtt op "Sechseläuten" eng Buerg (Böögg) verbrannt a bei eise franséischen Noperen ass et d'"fête des brandons".

Ursprénglech war d'Buergbrennen oder d'Faaschtefeier en heednesche Brauch a war nach ëmmer am Ufank vum Fréijoer. D'Feier steet symbolesch fir de Retour vum Fréijoer, respektiv d'Verdreiwe vum Wanter. Et ass den Triumph vun der Hëtzt iwwer d'Keelt.

Fréier hunn d'Baueren an d'Wënzer vum Buergbrenne profitéiert, fir d'Wieder virauszesoen: "Wéi den Damp op Buergsonndeg geet, sou geet en de ganze Virsummer". Experte soen awer och, dass d'Wuert "Buerg" u sech näischt mat enger Buerg ze dinn huet, mä ass op dat laténgescht Wuert "burere", also "brennen" zeréckzeféieren.

D'Buergbrenne vun de "Buergfrënn"

Eng vun de gréissere Buergen, déi dëse Sonndeg verbrannt gëtt, ass déi an der Gemeng Nidderaanwen, wou d'"Buergfrënn" schonn déi lescht zwou Wochen um Opbaue sinn. Den eigentleche Prozess fänkt awer all Joer schonn am November un, wann hir zwee "Architekten" e puer Propositioune fir d'Konzept vun der Buerg maachen.

Nodeems dann eent dovunner gestëmmt gouf, gëtt d'Material zesummegesicht. Dëst Joer waren iwwer 2.000 Paletten an 70 Kilo Neel noutwänneg, fir d'Buerg um Feld tëschent Nidderaanwen a Mënsbech ze bauen.

Verbrannt gëtt d'Buerg e Sonnden. E Samschden organiséiert de Kollektiv "PEAK" awer nach een Evenement mat enger Partie DJ'en, enger Luuchte-Show a Feierspäizerten.

Eng Traditioun, déi ännert, mee lieft

Dëse Weekend gi queesch uechter d'Land d'Buerge gebrannt. Dat fir op symbolesch Aart a Weis dem Wanter Äddi ze soen. Wärend d'Buergen am Zentrum a Süde vum Grand-Duché éischter vun de lokale Pompjeescorpsen oder de Scouten opgeriicht ginn, iwwerhuelen am Éislek dacks d'Clubs des jeunes déi Aufgab. Ma well déi op ville Plaze net méi sou breet opgestallt sinn, wéi nach virun enger Partie Joren, kënnt et och alt mol zu méi alternative Léisungen. Sou zum Beispill zu Housen, wou nieft der Jeunesse och nach d'Membere vun der asbl FOAH eng Hand mat upaken. Dat huet mat der Zäit derzou gefouert, datt d'Buerg net méi Sonndes, mee Samschdes gebrannt gëtt. De President vun der FOAH, Roland Heinen, erkläert.

"Jo, ech menge mir ginn och alleguerte méi al. Mir hunn da selwer och scho Familljen a Kanner an et ass fir eis einfach méi flott, well Samschdegowes hunn d'Leit méi Zäit. Oft ass et sou, datt d'Buerg an de Schluss vun der Fuesvakanz fält, an datt Méindes scho rëm d'Schoul ugeet. Mee d'Leit wëllen net onbedéngt Sonndesowes, néng, zéng Auer mat hire Kanner an der Natur stoen. Dofir hu mer gesot, mir maachen dat Samschdes, da kënne mer dat gemittlech maachen a jidderee ka mat derbäi sinn."

Datt een hautdesdaags mat Bléck op den Ëmweltschutz eng Partie Saachen, wéi zum Beispill Pneuen, net méi verbrennen duerf, géing d'Baue vun der Buerg iwwerdeems net méi schwéier maachen. Et wier par Konter gutt, datt et mëttlerweil am Bewosstsi vun de Leit ukomm wier, datt een op d'Natur oppasse muss.

Wou a wéini?

Buergbrennen: Opriichten zu Bartreng (14.2.24)

Les photos diffusées sur ce site sont soumises à des droits d’auteurs et ne peuvent être copiées, modifiées, vendues, sans l’autorisation préalable du propriétaire du site en question.

Wou a wéini gëtt dëst Joer de Wanter verbannt? Schéckt eis Informatiounen iwwert Ären Evenement hei iwwert de Formulaire eran.

Tipp: Wann dir op dëser Plaz kee Formulaire gesitt, musst Dir fir d'éischt d'Cookies vum Site acceptéieren.