Um Virowend vun Nationalfeierdag gouf et an der Uelzechtdall-Gemeng net nëmme Musek an z’iessen an ze drénken, mee ëm 23 Auer stoungen d’Leit prett um Futtballsterrain, fir an den Himmel iwwert dem Sportkomplex ze kucken: No an no sinn an der Däischtert lauter Dronen an den Nationalfaarwen opgedaucht an hunn d’Leit mat op eng Rees duerch d’Geschicht vu Walfer geholl, déi och nach iwwer Mikro erkläert gouf.
D’Drone sinn hin- an hiergebëselt an hunn zum Beispill d’Kierch, e Buch, eng Äerdbier, eng Rous, de Roude Léiwe duergestallt, éier se rëm – natierlech nees an den Nationalfaarwen – hannert de Sportshale mam markanten Zeltdaach virdru verschwonne sinn.
D’Leit hu geklappt – a well hinnen d’Show fir 175 Joer Walfer esou gutt gefall hat, gouf kuerz drop annoncéiert, datt d’Dronen ëm Hallefnuecht direkt nach emol géifen an den Himmel klammen.
