D'Urteel riicht sech géint d'Gesetz, dat schonn zanter 1968 an den USA a Kraaft ass. Nach kann awer virum Ieweschte Geriichtshaff geklot ginn.

E Geriicht an den USA huet d'Verkafsverbuet vu Waffe respektiv an dësem Fall Revolver a Pistoulen duerch staatlech zougeloossen Händler u Jonker, déi manner wéi 21 Joer hunn, opgehuewen, well dëst géint d'Verfassung verstousse soll. Den zweeten Zousaz vun der Verfassung seet, datt d'"Recht vun de Mënschen, Waffen ze besëtzen a bei sech ze hunn, net verletzt dierf ginn", esou d'Riichter vun New Orleans en Donneschdeg.

Am Zousaz vun der Verfassung ass keng Alterslimitt virgesinn, esou déi dräi Riichter, déi als staark konservativ agestuuft ginn. Dëst Gesetz war 1968 vum Kongress decidéiert ginn an elo haten dräi Gruppen, déi sech fir d'Wafferecht asetzen, esou wéi e puer Eenzelpersounen am Alter tëscht 18 an 21 dogéint geklot.

Wärend US-Bierger ënner 21 Joer aktuell nach keng Revolver oder Pistoule vu staatlech unerkannte Waffenhändler dierfe kafen, ass de Kaf vun engem Gewier oder enger Schroutflënt allerdéngs méiglech. Och dierfe Jonker Pistoulen oder Revolver vun enger Privatpersoun oder op enger Waffefoire kafen.

D'Organisatioun Everytown Law, eng Initiativ géint d'Gewalt duerch Schosswaffen, kritiséiert d'Decisioun vum Geriicht. D'Gesetz vun 1968 géif "esouwuel der Verfassung entspriechen, wéi och fir déi ëffentlech Sécherheet suergen". Schosswaffe wieren déi heefegst Doudesursaach bei Kanner a Jugendlechen a Jonker tëscht 18 an 20 Joer al wieren de Statistike vun der Police no un "dräi emol esou villen Doudesfäll duerch Schosswaffen wéi Erwuessener vun 21 Joer" bedeelegt, esou d'Initiativ.

Dat héchste Geriicht an den USA hat d'lescht Joer en Urteel vum nationalen Appellsgeriicht zu New Orleans gekippt an e Gesetz confirméiert, datt Leit, déi wéinst haislecher Gewalt verurteelt goufen, keng Schosswaffe méi dierfe besëtzen. Och dëst Gesetz hat d'Appellsgeriicht als "géint d'Verfassung" agestuuft.