Beim Télévie 2019 gouf d'Rekordzomm vun 2.005.842 Euro gesammelt. Hei e Resumé vum Event an och déi ganz Tëleesemissioun, fir se nach eemol ze kucken.

Domat hätt wuel kee gerechent. Net nëmmen ass de Rekord vun 1,67 Milliounen Euro vum leschte Joer geknackt ginn, mä och d’Zwou-Millioune-Grenz gouf iwwerschratt. E ganze Koup Suen, déi der Kriibsfuerschung ze gutt kommen. Mat esou engem héije Montant hätt d’Diane Wunsch, Télévie-Coordinatrice, nimools gerechent. "Ech sinn iwwerwältegt, ech sinn immens frou an ech si virun allem immens dankbar", esou d’Diane Wunsch no der Marathon-Sendung vu 4 Stonnen.

Wéi och déi Editioune virdru war dësen 18. Télévie eng besonnesch Emissioun – mat Momenter vu Freed, Trauer an Hoffnung. Nieft den Temoignagë vun de Kriibs-Patiente war och den Optrëtt vum David Ianni en emotionalen Héichpunkt. Als Hommage un de verstuerwene Grand-Duc Jean huet hien e Lidd komponéiert gehat.

Trotz Staatstrauer si Patienten a Chercheuren op Donen ugewisen. "Si hänke komplett an direkt vun eis of", erkläert d'Télévie-Présentatrice Caroline Mart. Et géing een all Joer mierken, wéi d’Fuerschung virugeet a wéi wichteg et dowéinst ass, net opzehale mat Sue sammelen.

Ma obwuel d’Fuerschung scho rise Fortschrëtter gemaach huet, bleift nach vill ze maachen. Zwou Milliounen Euro sinn awer scho mol e gudden Ufank.

D'Emissioun am Replay (3 Deeler)

Hei kënnt Dir déi ganz Emissioun vum Samschdeg den Owend op RTL Télé Lëtzebuerg nach eemol genéissen.

VIDEO: Télévie 2019: Deel 1 (19h00-19h30)
E Samschdeg war déi grouss Finall vum Télévie 2019.
VIDEO: Télévie 2019: Deel 2 (20h00-22h00)
E Samschdeg war déi grouss Finall vum Télévie 2019.
VIDEO: Télévie 2019: Deel 3 (22h00-0h00)
E Samschdeg war déi grouss Finall vum Télévie 2019.