D’Patronat wëllt an der Tripartite am Kontext vun der Aarbechtspolitik net méi verhandelen, mä just nach dialogéieren.

D’Dräierverhandlungen hätten de Patronen an de leschte 40 Joer kaum eppes bruecht. Dat sot den UEL-President Nicolas Buck am Face-à-Face op der Télé.

Fir den André Roeltgen, OGBL-President, ass dat eng falsch Duerstellung vun der Geschicht an ee klore Réckschrëtt. Hie mécht en dréngenden Appell un d’Patronen, un de Verhandlungsdësch zréckzekommen. Hannergrond ass de rezenten Eclat am CPTE, dem Comité permanent du travail et de l’emploi, wou d’Patronat annoncéiert hat, net méi iwwert Aarbechtsrecht an der Dräierronn wëllen ze verhandelen.

D’Gewerkschaften OGBL, LCGB an CGFP gesinn doranner ee Boykott vum Lëtzebuerger Sozialmodell an hunn eng Protestmanifestatioun den 19. November annoncéiert.