Google wëll zu Biissen an 2 Phasen en Datenzenter bauen. Dëst wier zwee Mol en Investment vu ronn 600 Milliounen Euro, sou d'Responsabel am RTL-Interview.

Doduerch géingen och vill Aarbechtsplaze geschaaft ginn, hu se am Gespréich betount.

Zanter Juli 2017 zirkuléiert zu Lëtzebuerg de méigleche Bau vun engem Google-Datazenter zu Biissen. Virop huet d'Politik ëmmer nees annoncéiert, datt den Internetris sech elo géif néierloossen. Déi lescht Zäit war et méi roueg ginn, bis virun e puer Deeg eng Biergerversammlung fir dësen Donneschdeg annoncéiert gouf. De Jeannot Ries an de Pierre Weimerskirch hunn am Virfeld mat de Responsabele vu Google zu Bréissel iwwert hir Pläng fir Biisse geschwat.

D'Gebailechkeete sollen an 2 Etappe gebaut ginn

Bannent de leschte Jore goufen eng ganz Rei Etüden ofgeschloss, déi vill Zäit kascht hunn. Zäit ass jo bekanntlech och Geld. Ma wat si schonn e puer Dausenden Euro, wann um Enn e Milliounen-Investissement am Raum steet? Well laangfristeg kéinten an zwou Etappen zwee grouss Google-Datenzentren zu Biissen aus dem Buedem schéissen. Zwee Mol 600 Milliounen Euro - en Investissement vun 1,2 Milliarden Euro vu Google.

Wat ass geplangt? Zwee ongeféier 30.000 Meter Carré grouss Datenzentre mat zwee Stäck, maximal 25 Meter héich. Also manner grouss, wéi ufanks vum Wirtschaftsminister ugekënnegt gouf.

De Fabien Vieau, Responsabel fir d'Entwécklung vun den europäeschen Datazentren, iwwert den aktuelle Stand:

Google huet säin europäesche Siège an engem moderne Bëtonsgebai matten a Bréissel tëscht dem Europäesche Parlament an der Kommissioun. Bannen déi typesch Google-Atmosphär, an der Receptioun leeft Rockmusek, iwwerall sti Planzen an un der Mauer de Logo vum Internetgigant. No bausse gëtt ee sech als modern an hype. Vill no bausse kommunizéiere wëll een net, sou d'Strategie, déi vu Kalifornien aus zanter Jore propagéiert gëtt. Sou verwonnert et net, datt et elo iwwer 2 Joer gedauert huet, bis ee sech zum méigleche Projet vun engem Datazenter am Grand-Duché positionéiert.

Wéi soll den Datazenter gekillt ginn?

Eng vun de Froen, déi aktuell am Raum steet, ass déi vum "Wéi soll den Datazenter gekillt ginn?". Potenziell Léisunge ginn et och schonn, wat ee vun den haaptméigleche Problemer ubelaangt: nämlech de Killsystem. Waasser aus der Uelzecht kéint agesat ginn. Den Impakt op den Debit géif bei der éischter Phas bei 1% leien. Spéider, an der zweeter Phase, bei 2%. Den Impakt op d'Qualitéit vum Waasser, wat zeréck an d'Uelzecht lafe géif, wier geréng, sou Google. D'Temperatur géif zum Beispill net emol ëm 1 % eropgoen. Wäerter, déi kloer ënnert den Europäeschen Norme leien, sou de Spezialist. Deen am selwechten Otemzuch dorop hiweist, datt d'Technologie am Beräich Datenzenter konstant evoluéiert. Bis zu Biissen gebaut gëtt, leeft nach vill Waasser d'Uelzecht erof. Fréistens 2023, je nodeem, wéi d'Prozeduren an och d'Nofro am Geschäft mat den Date bis dohin evoluéiert.

Aktuell ass een nach an der Prozedur, de PAP huet ee mëttlerweil agereecht. Enn vun dësem Mount kritt d'Ëffentlechkeet Asiicht an den Dossier. Fir de Frederic Descamps, Manager vum Datazenter vu Saint Ghislain an der Belsch, ass et den Ament schwiereg, de Projet bis an de leschten Detail ze presentéieren. D'Technologie géif sech enorm séier weiderentwéckelen.

Dësen Donneschdeg um 18 Auer huet den Internetgigant op eng Informatiounsversammlung op Biissen invitéiert.