Wéinst der Alerte Rouge goufen um Méindeg eng ganz Partie Saachen ofgesot. All Detailer hei op RTL.lu.

Si soss nach Eventer ofgesot, Schoulen oder Crèchen, déi zoubleiwen, sot eis Bescheed via Mail op red[at]rtl.lu.

Keng Schoulflicht um Méindeg an den ëffentleche Schoulen

D'Schüler aus den ëffentleche Schoule sinn also entschëllegt, wa se net sollten an d'Schoul goen. D'Schoule bleiwen awer op, an et gëtt och e Service d'Accueil fir d'Schüler assuréiert. Et gi keng Coursen gehalen an d'Course mussen och net nogeholl ginn. Dat huet eis de Ministère bestätegt. D'Enseignante fir hiren Deel sinn awer an den ëffentleche Schoulen net fräigestallt.
De Lycée Michel Rodange deelt dann nach mat, dass d'Schüler keng Excuse musse virweisen, wa se um Méindeg net an d'Schoul kommen, an dass d'Prüfungen, déi fir en Dënschdeg geplangt sinn, normal geschriwwe ginn.

Wat elo Privatschoulen ugeet, alignéieren déi sech ganz dacks um Ministère heescht et op Nofro hin. (Den Detail dozou méi déif an dësem Artikel).

De Schülertransport vum TICE fält dann um Méindeg och aus. Dat gouf RTL via Telefon matgedeelt.

D'Stater Schoul-Bussen fueren awer.

E Méindeg fueren dernieft all RGTR & Capabs Servicer. Dat betrëfft och de Schülertransport. Domat ass en Transport fir all déi Schüler assuréiert, déi an d'Schoul oder en "Centre de Compétence" mussen. Et ass awer mat Perturbatiounen ze rechnen.

Parkinge gi geraumt

Wéinst dem annoncéierte Stuerm an och dem Ree ginn och Parkingen am Land geraumt: sou ass vun 18 Auer un den Däichparking zu Ettelbréck zou - all d'Chaufferen, déi hei nach hiren Won stationéiert hunn, gi gefrot,deen direkt ze réckelen.

RTL

Um 20 Auer stoungen nach eng Partie Autoen um Parking. / © Domingos Oliveira

CFL: Wéineg Retarden

Ausser e puer Retarde goufen et e Méindeg de Moie keng Schwieregkeete vu Säite vun de CFL. Duerch de staarke Wand sinn d'Zich bis 7.30 Auer just mat enger limitéierter Vitesse gefuer. Zu gréissere Suppressiounen, duerch zum Beispill ëmgefale Beem, koum et net. Zu Komplikatioune koum et awer op de Strecken tëscht Lëtzebuerg – Tréier a Lonkech. Dat well e groussen Deel vum Eisebunnsverkéier hannert de Grenzen agestallt gouf. D'Remplacements-Busser op Lonkech ginn nach bis 16 Auer agesat.

Ier een den Zuch um Méindeg hëlt, gëllt et sech op der App oder um Site cfl.lu z'informéieren, ob den Zuch iwwerhaapt fiert, respektiv mat wéi engem Retard ze rechnen ass.

Keng Zeitungen

Wéi d'Post matdeelt, ginn um Méindeg de Moie keng Zeitungen ausgedroen. Wat déi normal Bréifpost ugeet, riskéiert et och zu Verspéidungen ze kommen.

RTL

Hollerecher Strooss, 22 Auer / © Domingos Oliveria

Educatioun: Schüler fräigestallt (ëffentlech Schoulen)

Den Educatiounsministère huet an engem Communiqué e Sonndeg de Moie matgedeelt, dass wéinst der Alerte Rouge d'Schüler am Fondamental an an den ëffentleche Lycéeë vun de Course fräigestallt sinn. An de Schoulen, Lycéeën a Centre de compétences gëtt awer e Service d'accueil assuréiert. De BSI am LTPS ass och fräigestallt.

Och d'Europaschoul ass zou um Méindeg.

-Fir d'LASEP gëllt iwwerdeems dat nämmlecht, wéi fir de Rescht vun de Schoulen. Déi Jonk si fräigestallt. D'Personal vun der LASEP assuréiert e Service d'Acceuil.

Vun der Uni Lëtzebuerg dann eng interessant a wichteg Nouvelle fir hir Mataarbechter, also och d‘Proffen: dës Leit kënne vun Doheem aus schaffen. Fir d'Uni-Studenten gëllt dat selwecht, wéi fir all aner Schüler am Land: si kréien um Méindeg eng Dispens, brauchen sech also net an d'Kueren op de verschiddenen Campusen vun der Uni.lu ze deplacéieren.

Educatioun: Privat Schoulen

-De Lycée Privé Emile Metz alignéiert sech op d' "Dispense de la fréquentation des cours dans les écoles publiques" fir Muer de Méindeg 10.02.2020. Och den LPEM bleiwt op a bidd e "Service d'Accueil" fir seng Schüler.
D'selwecht bei de Privatschoule "Marie Consolatrice" zu Esch an "Saint-Anne" zu Ettelbréck.

-D'École privée Fieldgen alignéiert sech och, d'Schüler si fräigestallt.

Déi Schüler, déi sech bei Aktivitéiten op fräiwëlleger Basis ageschriwwen hunn, mussen net an d'Aktivitéite kommen. Et gi d'Präsenzen notéiert vun deene Schüler, déi kommen. Déi déi net kommen, mussen eng Excuse virweise kënnen, heescht et vun der Directrice Renelde Urbain.

-D'Sainte-Sophie alignéiert sech op d' "Dispense de la fréquentation des cours dans les écoles publiques" fir Muer de Méindeg 10. Februar 2020. E service d'accueil fir d'Schüler gëtt assuréiert.

-Vauban École + Lycée Français du Luxembourg Suite à l’avis de tempête de Météolux et au message du Ministère l’Éducation Nationale, de l'Enfance et de la Jeunesse  luxembourgeois aux écoles publiques, je vous informe que les élèves de Vauban Ecole et Lycée Français de Luxembourg seront également dispensés de cours demain lundi 10 février par précaution. L’établissement restera ouvert pour assurer un accueil aux élèves  qui viendraient. Les enseignants et membres du personnel assureront l’accueil des élèves présents. Les navettes scolaires ne circuleront pas pour les enfants du primaire.

-D'St George's International School" bleift um Méindeg zou. D'Schüler si gebieden doheem ze bleiwen. Dat deelt den Dr. Christian Barkei mat.

-L'International School of Luxembourg sera fermée demain lundi 10 février, suite à l'alerte rouge déclarée par Meteolux.

-D'Schüler zu Déifferdeng sinn och um Méindeg fräigestallt. Weider Detailer hei am Schreiwes.

-D'Waldschoul an d'Maison Relais Waldschoul zu Diddeleng  hat scho virdrun matgedeelt, e Méindeg zouzebleiwen. D'Schüler kommen an der Brill-Schoul ënner. Den Accueil fir d'Kanner aus der Maison Relais ass an der Maison Relais Schwemm.

-D'Waldorfschoul um Lampertsbierg ass um Méindeg zou. E Service d'accueil fir d'Schüler ass awer assuréiert.

- Zu Esch bleiwen d'Maison Relais um Méindeg zou. Et gëtt en Accueil assuréiert, ma et ass den Opruff un d'Elteren, dach wann nëmme méiglech, mat de Kanner doheem ze bleiwen. De Pédibus zu Esch fält aus.

- Communiqué par : Les Internats Jacques Brocquart asbl :

Pour la journée du lundi, 10 février 2020 les internats suivants:

Convict Episcopal à Luxembourg / Institution St-Willibrord à Echternach / Internat Jos Schmit à Diekirch / Internat Sainte-Anne à Ettelbruck / Internat Ste Marie à Mertzig et Internat du Nord (+Villa) à Wiltz ouvriront selon leurs temps d’ouverture respectifs usuels, afin d’assurer un service d’accueil à l’intention des élèves-internes qui s’y rendront.

D'Sunflower-Crèchen sinn op, awer mat engem limitéierten Zerviss. Si roden och, fir d'Kanner net an d'Crèche ze bréngen.

RTL

Val des bons malades / © Domingos Oliveira

Schülertransport

Den Schülertransport vum TICE gëtt um Méindeg net assuréiert. Déi Busser fueren also net. D'Schüler, déi awer an d'Schoule fueren, sinn opgeruff, den normalen ëffentlechen Transport ze notzen.

-D'Schoulbusser vun der Europaschoul fueren um Méindeg och net.

- D'Gemeng Munneref deelt mat: De Schoultransport fir d‘Grondschoul ass annuléiert.  D‘Course vun der Regional Museksschoul Munneref sinn ofgesoot. D‘Crèche Spruddelmailchen bleiwt wéi gewinnt op.  Dir sidd gebieden d'Poubelle réicht muer (10.02) de Moien vrun d‘Dier ze stellen.

Zu Noumer ass kee Schoultransport.

Och zu Buurschent ass de Schülertransport annuléiert. Méi an dësem Schreiwes

Zu Béiwen, Bëschdref, Brouch, Huelmes an Tënten gëtt en Accueil an de Schoulgebaier assuréiert.
D’Kanner sollen an deem Duerf vum Accueil profitéieren, wou si och wunnen an net an een anert Duerf fueren. Si bleiwen och de ganzen Dag wärend de Schoulzäiten an deem Gebai. De Bus fiert viraussiichtlech den normalen Tour. Och d’Maison Relais Tënten a Bëschdref sinn normal op (moies fir den Accueil, an der Mëttesstonn an ab 16 Auer).

Aus Sécherheetsgrënn ass de Schoultransport fir d’Grondschoul an der Fëschber Gemeng ofgesot de Méindeg, den 10. Februar 2020. An der Angsber Schoul gëtt zu den normale Schoulzäiten en Accueil fir d’Kanner garantéiert. D’Maison Relais an d’Crèche sinn zu de gewinnten Auerzäiten op, an d’Elteren sollen weg. drun denken fir d’Kanner ofzemellen wann si net komme sollten.

De Schoultransport an der Gemeng Käerjeng soll normal lafen. Et kéint awer zu Retarde kommen.
(Les courses Pedibus de Bascharage et Clemency sont annulées. Les services de la Maison relais fonctionneront comme d’habitude.Dans chaque bâtiment scolaire, les membres du personnel enseignant prendront en charge les élèves et assureront un service d’accueil pendant les heures de classe.)

Wat de Schoulsyndikat Billek ugeet, gëtt en Accueil um Site assuréiert. D'Maison Relais wäert normal fonktionnéieren. Zum aktuellen Zäitpunkt fënnt de Schoultransport normal statt. ( Falls d'Situatioun an der Nuecht oder am Moien den Transport net méiglech maache sollt, informéiere mer Iech iwwert eise Site. )

Zu Dippech gëtt et eng Permance an en Acceuil an der Schoul, an en normale Schülertransport. Dat gëllt och fir d'Maison Relais, och wann d'Leit d'Kanner wa méiglech doheem hale sollen.

De Pédibus an der Gemeng Réiser fält um 10. Februar aus, aus Sécherheetsgrënn. D'Schoulbusser fueren awer zu de gewinnten Auerzäiten.

An der Gemeng Steesel fiert de Schoultransport um Méindeg wéi gewinnt. Et gëtt en Accueil vun de Kanner  an der Schoul assuréiert, d’Maisons  Relais funktionéieren normal.

Zu Biissen ass d'Schoul an d'Maison Relais op fir en Acceuil vun de Schüler. De Schülertransport leeft wéi normal.

An der Gemeng Konsdref ass de Schoultransport assureiert.

RTL

Miersch, 23.45 Auer / © Domingos Oliveria

Musekschoulen

De Stater Conservatoire seet och alles fir e Méindeg of.

(Le Conservatoire (Bâtiment central, 33, rue Charles Martel L-2134 Luxembourg) restera ouvert de 07h00 à 23h00 pour assurer un service d’accueil à l’intention des élèves qui s’y rendront. La représentation “KIC – Kolléisch in Concert” à 19h00 (Auditorium) aura lieu comme prévue.)

D'UGDA Museksschoul alignéiert sech un de Communiqué vun dem Ministère de l'Education nationale, de l'Enfance et de la Jeunesse an deelt mat, dass all Coursen an Examen e Méindeg ofgesot sinn an och d'Léierpersonal fräigestallt ass.

D'Direktioun vum Conservatoire du Nord (Dikrech & Ettelbréck) deelt mat, dass e Méindeg all d'Coursen ausfalen. Och d'Enseignante si fräigestallt.

D’Direktioun vun der Iechternacher Regionaler Musekschoul deelt mat, dass e Méindeg all d’Couren an Concoursen ausfalen. Och d’Enseignante si fräigestallt.

D'Direktioun vum Conservatoire vun Esch deelt mat, dass e Méindeg all d'Coursen ausfalen. Och d'Enseignante si fräigestallt.

Keng Coursen dann an der Museksschoul am Kanton Réiden um Méindeg.

Dat nämmlecht gëllt fir déi regional Museksschoul zu Diddeleng. (L’Ecole Régionale de Musique (Bâtiment central, CCRD opderschmelz, 1a, rue du centenaire L-3475)  restera ouvert pour assurer un service d’accueil à l’intention des élèves qui s’y rendront.)

RTL

Alzeng / © Domingos Oliveria

Flich

- Um Fluchhafen LuxAirport um Findel sinn e sëllege Flich Richtung London, München, Amsterdam, Zürich oder Frankfurt annuléiert.

D'Luxair deelt um Méindeg de Moie mat, dass all hir Flich bis viraussiichtlech 10 Auer annuléiert sinn. Dat sinn der eng Dosen. Den éischten nees geplangte Vol ass dee vun 10.30 Auer op Wien.

D'Luxair recommandéiert, fir sech am Virfeld z'informéieren oder um +352 2456-1 unzeruffen.

Aner ofgesote Manifestatiounen oder Zervisser

Wat den Offalltransport ubelaangt, sinn d'Awunner vun der Stad gebieden, keng Poubellë virun d'Dier ze stellen, déi vum Wand kënne wechgeblose ginn.

RTL

Um Kierchbierg / © Domingos Oliveira

- D'Tournée A vun de groe Poubelle fält dann och zu Esch ewech. Déi gëtt en Dënschdeg nogeholl. All Kollekte vun den anere Poubellë vun den Touren A a B ginn dës ganz Woch ëm een Dag nohanne verréckelt.

- E Méindeg sollt d'Press nei Ambulanze vum CGDIS presentéiert kréien. Well de CGDIS awer wuel vill am Asaz wäert sinn, gouf déi Pressevirstellung ofgesot an et gëtt no engem neien Datum gesicht.

- Pressekonferenz vum SNE gouf op e Mëttwoch um 11.45 Auer verluecht.

- D'Valorluxsammlung zu Diddeleng an zu Suessem ass ofgesot.

- Den Training fir Junior & Senior vum Mierscher Turnveräin ass ofgesot.

- Ofgesot ass och de Concert vum „Trierer Kaffeehaus-Orchester“ zu Veianen am Schlass.

- Fotoreportage Kasachstan a Kirgistan vum Här Lepage e Méindeg den Owend am Club Haus am Becheler um 17:00 Auer ass wéinst de Wiederkonditiounen ofgesot.

- D'Workshoppen um Méindeg vun der Solidaritéitswoch am Mamer Lycée sinn ofgesot.

- Zumba-Coursen vun den Zumbachicas sinn um Méinden zu Lamadelaine ofgesot.

- De SICA deelt mat, dass all Kollekte vun e Méindeg ofgesot sinn. Dat sinn: Valorlux-Sammlung zu Garnech, Hausmüll zu Stengefort a Bio zu Mamer.

Hausmüll Stengefort gëtt um Dënschdeg nogeholl, Valorlux Garnech en Donneschdeg den 13. Februar a Bio Mamer e Méindeg de 17. Februar.

De Recycling-Center zu Kielen huet normal op.

- D'Fondatioun Kräizbierg ass, anescht wéi gemellt, um Méindeg net zou.

- D'Visite Guidée vum Recycling-Center fir d'Senioren aus der Stad ass och ofgesot.

- De Parc Neuman um Lampertsbierg bleift um Méindeg zou.

RTL

Si soss nach Eventer ofgesot, Schoulen oder Crèchen déi zoubleiwen, sot eis Bescheed via Mail op red[at]rtl.lu.