Solidaritéit gëtt zu Lëtzebuerg ëmmer grouss geschriwwen, virun allem an dësen ongewëssen Zäiten.

Mir hunn zu Lëtzebuerg entretemps iwwer 600 Coronavirus-Fäll. Mir sinn do ukomm, wou et ufänkt, kritesch ze ginn a sinn an enger Situatioun, déi mer nach ni haten. De Virus ass do, mä d'Solidaritéit och.

Ganz spontan hu sech sëllege Gruppe vu private Leit gegrënnt, déi vulnerabele Persounen ënnert d'Äerm gräife wëllen a Support offréieren. Sief et, fir eng Ordonnance sichen ze goen oder mam Hond erauszegoen. Och mir versichen, d'Leit dobaussen z'ënnerstëtzen a bidden hinnen eng Plattform, esouwuel um Radio, wéi och op RTL.lu. Dir kënnt entweder Initiative virstellen, e Wonschlidd spillen oder Famill oder Frënn gréissen, déi een den Ament net besichen dierf.

Dir kënnt eis Är Aktioun oder Äre Wonsch eramelle via:
- Repondeur 1333
- Texter a Sproochnoriichten iwwer WhatsApp (621 666 555)
- Email op d'Adress solidariteit@rtl.lu

Wann Dir als Privatpersoun elo och eng Hëllef ubidde wëllt, da maacht dat wgl. via eng vun de schonn existéierenden Initiativen oder kommentéiert ënnert dësem Artikel. Mir kënne schlecht elo Nimm vu Privatpersounen hei verëffentlechen, déi och hëllefe wëllen, ouni dobäi och Emailadressen oder Telefonsnummeren unzeginn. Merci fir Äert Versteesdemech.

Déi lescht Informatiounen iwwert de Coronavirus fënnt een um Site vun der Santé. Wann Dir Hëllef ubitt, denkt un Är eege Sécherheet an Hygiène.

Hëllef vun de Gemengen

D'Gemeng Dippech proposéiert säit dem 19/03/20 zesumme mam CIGR « Hexemeeschter » eng Rei Zerwisser/Hëllefen fir eis vulnerabel Leit. Hei de Link fir op eis Solidaritéits-Rubrik, wou mir eise Service pour personnes vulnérables virstellen. Mir gi fir d’Leit an de Cactus akafen, ginn an d’Apdikt a liwweren wa néideg Valorluxtuuten heem.

D'Scoute Groussbus bidden de Leit aus de Gemengen Groussbus, Mäerzeg, Viichten, Wal, Useldeng, Préizerdaul, Réiden hir Hëllef un a gi fir déi vulnerabel Leit akafen.

D'Gemeng Diddeleng weist sech solidaresch mat hire Commerçanten a lancéiert d'Initiativ #MäinDiddeleng.

Déifferdeng
bitt fir Leit iwwer 80 Joer eng weider Hëllefsaktioun un. Déi betraffen eeler Leit gi vun elo un iwwer Telefon vun engem Grupp bestoend aus 30 Leit (Gemengenaarbechter, Sozialaarbechter a Léierpersonal) kontaktéiert. Zil ass et, dass déi Leit en Uspriechpartner an der Isolatioun hunn, heescht et am Schreiwes.

De Bartrenger Schäfferot huet decidéiert, datt si och hirem lokale Commerce hëlleft an, an deem Sënn déi betraffe Locataire finanziell ënnerstëtzt. 16 Kontrakter si vun der Hëllefsmesure concernéiert.

Zu Bartreng proposéiert d'Gemeng zanter e puer Deeg eng ganz Réi Hëllefe fir vulnerabel Léit. Eng dovun ass datt de Service d'Accueil vun der Schoul elo fir Risikopersounen an de Supermarché an an d'Apdikt akafe geet, an dës Wuer bei si Heem liwwert.

D'Gemeng Lenneng bitt och hir Hëllef un. Si maache Kommissiounen a gi Medikamenter an d'Apdikt fir d'Leit sichen.

D'Gemeng Fréiseng wäert vum 16. bis viraussiichtlech 29. Mäerz zoubleiwen. Fir administrativ Noutfäll soll ee sech iwwer Telefon um 23 66 84 08-1 oder per Email: secretariat@frisange.lu, biergercenter@frisange.lu oder technique@frisange.lu mellen. D'Gemeng respektiv aner Servicer bitt de Leit och Hëllef un.

D'Gemeng Diddeleng bitt och ee Service fir vulnerabel Leit un, fir fir si akafen ze goen. Hei fannt Dir déi franséisch an déi däitsch Lëscht mat de Produiten.

An der Gemeng Stengefort gëtt et och eng Aktioun fir de Leit, déi Hëllef brauchen, ënnert d'Äerm ze gräifen.

D'Gemeng Kanech deelt mat, dass och si e Service fir Kommissiounen ze maachen ubitt, ënnert anerem och fir an d'Apdikt ze goen.

Genee sou stellt sech d’Gemengeverwaltung vu Géisdref bereet an organiséiert e Service fir akafen ze goen, sief et Liewensmëttel, Medikamenter oder aner Saachen déi dringend gebraucht ginn. Dëst gëllt fir eeler Leit, Persounen déi gesondheetlech Problemer hunn, elengerzéiend Persounen oder fir Leit, déi keng Méiglechkeet hunn, fir sech ze deplacéieren.

Käschte fir d’Akeef gi vun der Gemeng virgestreckt an dir kritt dono eng Rechnung geschéckt. Dir kënnt dëse Service ënnert folgender Nummer ufroen:

Gemeng Géisdref: Tel. 83 92 70 respektiv iwwert e-mail : commune@goesdorf.lu. Wa Leit bereet sinn, fir eng Hand mat unzepaken, da mellt Iech w.e.g ënnert der Nummer 691 95 76 32.

Och d'Gemeng Suessem huet eng Partie Informatiounen iwwert de Coronavirus fir hir Bierger zesummegedroen. Dorënner wichteg Rotschléi an och alleguerten Evenementer, déi annuléiert goufen. Donieft huet d'Gemeng, zesumme mat de Service Senior+ d'Aktioun Solidaritéit+ an d’Liewe geruff, fir eisen eeleren a vulnerabele Matbierger bei Kommissiounen oder Spadséiergäng mam Hond am Alldag ënnert d’Äerm ze gräifen. Hei ginn et weider Informatiounen dozou:

D'Gemeng Käerjeng huet dann och verschidde Mesuren en place gesat, dat souwuel fir eeler a vulnerabel Leit, ma och fir Famillje mat Kanner an fir déi Leit, déi am Gesondheetssecteur schaffen. Donieft gouf och den Iessensdénscht vun der Gemeng ausgebaut, esou datt och elo d'Leit a Restaurante kënnen Iesse bestellen an et liwwere loossen oder siche goen. De Service Akaf fir Bierger gouf dann och op Leit am Alter vu 70 bis 75 Joer ausgebaut.

Zu Wuermer gëtt de Leit gehollef, andeem d'Gemeng e Service ubitt, dee fir déi eeler a vulnerabel Leit akafen geet, awer och fir si an d'Apdikt ka goen.

Am Käldall hu sech e puer Leit zesumme gedoen, fir hir Hëllef unzebidden.

Och zu Mäerzeg gëtt eng Initiativ fir ze hëllefen, déi sech via Facebook regroupéiert.

Zu Schëffleng kann een sech als Persoun iwwer 65 Joer beim CIGL Schifflange mellen, fir Kommissioune gemaach ze kréien. Melle kann een sech um 53 24 39 1.

Immopartner Sandweiler wëll a ka fir déi méi eeler Matbierger an déi méi vulnerabel Leit eng Hand upaken. Den éischte Kontakt ass scho mat der Gemeng gemaach.  Schéckt eng Email (sandweiler@immopartner.lu), SMS oder rufft un (621 562 272).

Gemeng Préizerdaul start a Collaboratioun mat der Maison Relais eng Aktioun, fir eeleren a vulnérable Leit hier Kommissiounen ze machen.

Genee sou bitt och d'Gemeng Mäertert, d'Gemeng Reckeng op der Mess, Hesper an d'Gemeng Déifferdeng esou Leit Hëllef un. D'Gemeng Déifferdeng huet dann och matgedeelt, datt si d'Rechnunge den nächste Mount net wäerte verschécken an esou den Awunner ënnert d'Äerm gräifen.

D'Gemeng Leideleng deelt mat, dass d'Repas sur roues op Demande un all Persoun iwwer 60 Joer oder u vulnerabel Persounen ausgeliwwert.

An der Gemeng Péiteng kënne vulnerabel Leit Hëllef beim Emergency Volunteer Aid Team froen. Si maache fir eeler a krank Leit d'Kommissiounen, gi fir si an d'Apdikten oder féiere se bei den Dokter.

D'Gemeng Bartreng huet dann e Flyer erausbruecht, wou sech vulnerabel Persoune kënne mellen, fir datt ee fir si akafen, an d'Apdikt geet oder datt si Iessen op Rieder kënne bestellen.

D'Gemeng Kiischpelt bitt den eeleren a vulnerabele Leit un, fir si akafen ze goen, sief dat Liewensmëttel, Hygiensmëttel oder Medikamenter, wann d'Leit e Rezept hunn. Dofir kann ee sech all Dag bis 15 Auer um 92 14 45 mellen an d'Saache ginn, wa méiglech, nach de selwechten Dag geliwwert.

D'Maison Relais Wëlwerwolz verdeelt e Mëttwoch tëscht 14:00 a 15:30 Auer Iesswueren.

Plattform Ican.lu


Ican.lu
ass eng Plattform, déi sou vill wéi méiglech Initiativë rassembléiert, déi sech solidaresch fir d'Residenten zu Lëtzebuerg an der Groussregioun weisen an och asetze wëllen.

De But vun dëser Plattform ass et, fir de Leit, déi d'Hëllef an dësen Zäite brauchen, eng Partie Service vu verschiddenen Associatiounen oder Privatpersounen unzebidden. Ze bemierken ass hei, dass net all Service gratis ass, well verschidde Betriber hir Leit bezuele mussen. Servicer déi heirënner fale sinn:

- Hëllef bei Akeef an d'Liwwerung virun d'Dier
- Vente vun Desinfektiounsmëttel
- Aner Déngschtleeschtungen, dat natierlech ëmmer am Kader vun hygienesche Standarden

Hei de komplette Communiqué vun Ican.lu

Ican.lu est une plate-forme de mise en relation des initiatives pouvant permettre aux résidents du Luxembourg et de la grande région d’exprimer leur solidarité pendant la pandémie de Coronavirus.

Entre les risques de contamination et les directives nous enjoignant légitimement à modifier nos relations aux autres, notre quotidien s’en trouve profondément modifié pour plusieurs semaines.

Dans ces moments très particuliers l’entraide et la solidarité redeviennent des valeurs fortes.

C’est pourquoi le but de ce site est de permettre aux initiatives provenant de sociétés comme de particuliers de bonne volonté de proposer ou de partager des gestes d’entraide, comme par exemple:

  • Aide aux courses et livraisons à domiciles ;
  • Vente (honnête) de solutions hydro-alcoliques ;
  • Et toutes autres initiatives d’entraide ;
  • Le tout bien entendu dans le respect de normes sanitaires strictes

Nous relayerons ces initiatives sur notre site et sur les réseaux sociaux pour leur donner plus d’amplitude. Nous contrôlerons bien-sûr le sérieux de ces propositions pour ne sélectionner que les plus sincères et nous ne pourrions être tenus pour responsable de l’avidité ou de l’opportunisme des plus mal intentionnés.

Notez bien que ces services ne sont pas forcement gratuits, ils dépendront également du coût de revient des entreprises qui auraient à rémunérer les personnels qui pourraient être engagés dans ces missions. Pour notre part nous veillerons qu’il n’y ait pas d’abus même s’il est normal que certaines de ces transactions soient par nature payantes.

20 Deeg, 14 Persounen an 12 Demanden – Projet „Eng Hand fir Jiddereen“

STEINSEL. WALFER: (ksw) Haut genee virun 20 Deeg hu mir an der Par STEESEL-WALFER Ste-Trinité ugefaangen mat eiser Hëllefsaktioun „Eng Hand fir Jiddereen“ fir eeler a vulnerabel Persounen op dem Territoire vun eiser Par, déi d‘ Gemengen Steesel a Walfer ëmfaasst. Mir hunn 14 Persounen déi hëllefen a bis haut 12 Demanden traitéiert. Mir waren akafen, an d‘ Apdikt an d‘ Epicerie Soziale. Mir ginn nët iwwerrannt, wat e kann als e positiivt Zeechen interpretéieren, well dat eis weist, dass d‘ Hëllef an de Familljen an der´Noperschaft funktionéiert. Mir wäerten weider hëllefen bis zum Schluss vun dëser Zäit. Vum dëser Woche un treffen mir eis all Donneschdeg um 19h00 am Porheem zu Walfer fir de Mënschen vun der Strooss am Garer Quartier eppes z’iessen an ze drénken ze bréngen.

Eis Permanencen sinn weiderhin dënschdes an donneschdes vun 9h00 bis 11h00, dann si mir iwwert den Telefon 26334024 oder per Mail karsten.steil@cathol.lu ze erreechen. Doriwwer eraus sinn mir ëmmer bereet Léit déi uruffen am Kader vun eise Méiglechkeeten ze hëllefen.

FGIL an SEW stelle Vakanzenhefter fir Schüler gratis zur Verfügung

Wärend der Period, an där d'Schoulen zou bleiwe mussen, hunn d'FGIL an SEW/OGBL decidéiert, déi populär Vakanzenhefter (Cycle 2.1. Mathematik, Cycle 2, Cycle 3 a Cycle 4) gratis als Download bereet ze stellen. Och d'Verbesserunge sinn online.

Fir z'evitéieren, dass d'Kanner ze laang virum Ecran sëtzen, kënnen d'Säiten ausgedréckt an um Pabeier ausgefëllt ginn.

Aner Initiativen

D'Vero Terver bitzt Schutz-Masken op Bestellung, fir en Tarif vun 2 Euro + Versand. Et kann een et erreeche via Telefon um 661 412 584.

Bei enger Spendenaktioun vu Roudbréck, enger Start-Up an Onlinebuttek, geet de Erléis aus der Vente vun den T-Shirten a Gadgeten aus der neier Solidaritéit-Kollektioun integral u Médecins sans Frontières.

SOS Villages d'Enfants Monde
mécht en Appell un d'Solidaritéit, fir och deene Kanner ze hëllefen, déi ënner schlecht Konditioune liewen.

De Studio Yogaloft géing gär all de Léit, déi am Gesondheetssecteur schaffe Merci soen an hinne gratis Yoga-Stonnen ubidden, fir datt si sech selwer eppes Guddes kënnen doen! Si kënnen eng Email un hello@yogaloft.lu schécken an de Stonneplang ass fir ze jiddereen op yogaloft.lu ze fannen.

E Grupp vu jonke Juristen, Ekonomisten a Web Designer huet eng nei Initiativ Nala.lu gegrënnt, fir Independanten a klenge Betriber zu Lëtzebuerg wärend der Corona-Kris ze hëllefen.

Op den Appell vum 25. Mäerz hin, huet eng Ekipp vu bal 20 Enseignanten a Schüler vum Lycée Privé Emile Metz, d'Fabrikatioun vu Maskuen RC2 an RC3 mat 3D-Printer an geschwënn och Laser-Cutter gestart. Bis ewell si bal 100 Maske fäerdeg a goufen ofginn. D'Ekipp "3D Print against Corona" schafft natierlech mat groussen Engagement weider.

Maison Relais Schoulkauz seet Merci
D'Maison Relais vu Wëlwerwolz seet de Leit, déi schaffe Merci, awer och deenen, déi doheem bleiwen.

De Pontalize, d’Fleege- a Betreiungsariichtung fir Senioren aus dem CHNP zu Ettelbréck, huet eng Spend vun 80 Maske kritt. D'Liette Baatz-Flammang, Néiesch um Härebierg, huet se gebutt. D’Stoffmasken sinn un d’Bewunner vum Pontalize verdeelt ginn.

De Kulturzenter Neimënster stellt seng Logementer, déi u sech fir d'Artiste geduecht sinn, dem Personal vu Servior, déi an Alters- a Fleegeheemer schaffen, zu Verfügung. Am Ganze kéint een hei 15 Persounen ënnerbréngen.

UNICEF Lëtzebuerg huet dann eng Selektioun mat Spiller an Aktivitéiten erausbruecht, déi d'Kanner doheem kënne maachen.

D'Online-Plattform tyoch.com bitt Experten, déi anere Leit dobäi hëllefe wëllen, de Stress vum Télétravail ze bewältegen a konzentréiert ze bleiwen, e gratis Abonnement un. Op dëser Homepage kënne Coachen an Traineren hir Online-Course gratis uleeën an ubidden. Entreprise kënnen da vu virtuelle Coursen an Traininge profitéieren. Weider Informatioune ginn et niewent der Homepage op der Nummer 621325995.

Den Ozone Trampolin-Park rifft d'Kanner an dësen Zäiten op, e Bild vun hirem Held oder enger flotter Situatioun an Zäite vum Covid-19 ze molen. De Park reservéiert gären eng Mauer an hirem Gebai, wou dës Zeechnungen a Biller opgehaange ginn a vun de Leit kënne gekuckt ginn. Och online kënnen dës Biller op hirer Homepage oder op hire soziale Reseaue gedeelt ginn. Dës Biller sollen op dës Mailadress geschéckt ginn: info@ozoneparc.lu. Ozone bitt och all deene Leit, déi nëmme wéineg Zäit mat hire Kanner konnte verbréngen, well se misste fir d'Bierger zu Lëtzebuerg schaffen, eng Stonn gratis Openthalt an hirem Park mat de Kanner un. En Datum heivir gëtt et nach net.

De Centre commercial "Zolwereck" huet an engem Schreiwes matgedeelt, hir Commerçanten, déi de Moment net schaffe kënne well alles zou ass, 2 Méint Loyer z'erloossen.

Solidaritéit a Krisenzäiten, och wat d'Produktioun vun Protectiouns-Material ugeet. Den Ament leeft eng landeswäit Aktioun, fir mat 3D-Printeren Viseure fir d'Gesiicht ze schützen ze drécken.

De Fichier fir den Drucker ass um Facebook beim Architecte-Bureau Metaform ze fannen.

Wéi et heescht, bräicht eleng den CHL nach eng 500 esou Masken, fir un d'Personal ze verdeelen.

Deen, deen esou Masken ka mam 3D-Drucker produzéieren, soll sech och an engem entspriechenden FB-Grupp mellen.

Link an de Facebook-Grupp

Den Tom Schockmel mécht och op Facebook den Opruff, fir Schutzbrëller am 3D-Drocker hierzestellen. Leit mat esou engem Drucker solle sech mellen.

Nom Motto #AllDagengBA a getrei zum Scoutsgesetz - 5. E Scout léisst keen am Stach.- , hunn d’Scoute vun der FNEL geduecht et wier ubruecht, sech als Scouten an den Déngscht vun der Gesellschaft an virun allem hire vulnerabelsten Leit ze stellen. Uechtert dat ganzt Land verdeelt, hu Gruppe sech ugebueden, fir mat klengen Aktiounen, de Leit ënnert d’Äerm ze gräifen, dëst selbstverständlech benevole.

D’FNEL Scouten proposéieren kleng Ënnerstëtzunge wéi z.B.:

• Akafen goen,
• Mam Hond eraus goen,
• Op d’Post goen, Bank, Apdikt, etc.

Iwwert en zentraliséierten Opruff kënnen déi bedierfteg Leit sech op enger Telefonshotline oder per Mail mellen.

Tél: 27 400 496
Mail: ba@fnel.lu

D’Hotline an d‘Mailadress si vun e Sonndeg mëttes um 14 Auer funktionell. Duerno all Dag vun 9 bis 17 Auer.

Och d'LGS, Lëtzebuerger Guiden a Scouten, bidden eng "Bonne Action" un, fir z.B. beim Akafen ze hëllefen oder Medikamenter an d'Apdikt siche ze goen. Weider Informatiounen doriwwer fënnt een hei.

Och LGS Groussbus huet an engem Schreiwes matgedeelt, dass si hëllefe wëllen, genee sou wéi d'LGS vun Ettelbréck hunn an deem Kader e Communiqué erausginn.

Och d'LGS St. Pirmin vum Séi proposéiert a Collaboratioun mat der Gemeng Esch/Sauer fir den eelere Matbierger an de vulnerabele Leit ënnert d'Ärem ze gräife bei Akeef a Livraisounen. Kontakter sinn déi heiten: Charel Elsen: 661 819 524  oder Yves Recker: 691 993 918

De Pakiesel erleedegt fir vulnerabel Leit Kommissiounen.

GoldenMe Luxembourg ass ee Projet vu Leit, déi sech engagéieren, fir eise méi eelere Matbierger ze hëllefen. Si hu sech dës einfach Aktioun ausgeduecht, fir datt déi méi Vulnerabel an dësen Zäite wëssen, datt se net eleng sinn.

De Jacques Glodt, dee scho wärend dem Tornado extrem aktiv war, huet nees eng flott Initiativ gestart. En huet och e Formulaire opgesat, deen een als Noper ausfëlle kann a verdeele soll u Leit, déi et brauchen.

D'Grënner vum Facebook-Grupp Lorentzweiler wëlle vun hirer Säit profitéieren, fir eng Lëscht mat Fräiwëllegen opzebauen, fir deene Leit ze hëllefen, déi entweder wéinst hirem héijen Alter oder gesondheetlecher Virgeschicht net sollen akafe goen oder doheem a Quarantän sëtzen.

De Sebastiaan van den Heuvel huet de Grupp Volunteer help against Corona - Luxembourg gegrënnt. Zil och hei ass eng gemeinsam Grupp fir d'Leit, déi Hëllef brauchen.

Eng aner Facebook-Säit, déi um Samschdeg gegrënnt gouf, heescht Corona-Virus-Hëllef-Lëtzebuerg.

Et ginn awer och privat Initiativen, wéi déi vum Jacquie Linden.

Zu Temmels an Däitschland huet d'Famill vum Michèle Lentz hir Hëllef ugebueden.

Och ënnert den Expats ass d'Solidaritéit grouss. Eng vun den éischte Gruppen, déi op Facebook gegrënnt gouf, heescht Luxembourg Coronavirus Support Group.

Donieft gëtt et op Facebook e weidere Grupp vun Expats, dee sech och solidaresch weist. Dësen heescht Luxembourg Expats COVID Community.

De Mark Kitchell benotzt Reddit als Plattform, fir Informatiounen ze sammelen an auszetauschen.
De Grupp "Zesummen staark" op Facebook, do si lauter Leit wéi z.b. Schouljofferen, déi proposéiere Kanner ze versuergen an hinne mat den Aufgaben ze hëllefen, Éducatricen, déi Kanner bei sech doheem wëlle versuergen a se beschäftegen.

Rodanger Guiden a Scoute proposéieren dann all den ufällege Leit an der Péitenger Gemeng, fir fir si akafen oder an d'Apdikten ze goen. Et kann ee si um 621671079 oder per Mail um Ba@rodange.lgs.lu kontaktéieren.

Den Helpgroup Coronavirus huet als Zil fir wichteg Informatiounen iwwert de Virus ze deelen. Esou ass kann een d’Covid19-Situatioun zu Lëtzebuerg richteg anzeschätzen an och fir en Iwwerbléck vun den Decisiounen an eisen Nopeschlänner kréien, déi en Impakt op Lëtzebuerg an den nächste Woche kéinten hunn.

De Literaturvermëttler Jérôme Jaminet huet nieft eegene Bicher och Buchspenden, ënner anerem vu Lëtzebuerger Auteuren, gesammelt a proposéiert fir se, haaptsächlech un eeler a vulnerabel Leit, an d’Haus ze liwweren. Wie bei der Aktioun matmaache wëll a flott Bicher ze verschenken huet, kann sech iwwert d’Facebooksäit "Der kritische Blick" mellen, oder eng Mail un j.jaminet@gmx.de schécken. Dat gëllt natierlech och fir eeler a vulnerabel Leit, déi net méi genuch ze liesen hunn, an déi sech op dësem Wee also och eppes wënsche kënnen.

Op Facebook huet sech elo e Grupp fir Studenten a Persounen, déi an der aktueller Situatioun de Primaner am Land sou gutt wéi méiglech wëllen hëllefen. Studenten hëllefe Primaner heescht dëse Grupp.

D'Kultur-Redaktioun vun RTL versuergt Iech dann och mat Fudder fir Kapp, Häerz a Gemitt, dat ma der Rubrik "Kultur fir doheem". Sief et Musek, Literatur oder soss e Beräich an der Kultur, eis Redaktioun hält Iech doheem um neiste Stand.

Aus dem Kulturberäich kënnt dann och e Projet vum Club Senior Nordstad zesumme mat der Maison des Associations. Si schreiwen Texter zum Thema Solidaritéit, déi opgeholl ginn an de Leit an de Spideeler, Personal a Kranken, solle virgespillt ginn. Donieft ass et och eng schéin a flott Oflenkung fir d'Leit am Club Senior.

Et ginn da vun Esch TV Leit gesicht, déi hëllefen, e Programm fir d'Kanner vun all Alter zesummenzestellen Déi ganz Aktioun leeft iwwert d'Facebookgrupp ICI CEST LES Parents.

Den Entspanungspädagog Christian Berrend bitt gratis Online Consultatioune un, fir Leit, déi am Gesondheets- a Fleegesecteur schaffen, respektiv a Supermarchéen.

Et gouf en neien Onlinesite mam Numm toussolidaires.lu gegrënnt. Dësen ass awer aktuell nach net operationell, esou datt een iwwer Twitter @SolidairesTous ka fueren. Hannert dem Projet stécht d'Ekipp vu Fish and Chips. Si wëlle mat hirem Site, Leit déi hëllefe wëllen eng Plattform zu Verfügung stellen.

Little Sparadise proposéiert de Leit, déi am Gesondheetssecteur schaffen, eng 30 Minutte gratis Massage, datt esoubal si hire Salon nees ophunn.