Zu Lëtzebuerg wär den analoge Retracement déi effektiivst Method, dat hätt d'Regierung och vun de medezineschen Experten hei am Land confirméiert kritt.

De perséinleche Kontakt wär beim Traçage immens wichteg. D'Feelerquot wär domat manner héich. Fir d'Infektiounskette manuell ze suivéieren, wär ee bereet, weider Leit an der Sanitärinspektioun anzestellen. Prioritär Beamten, déi en Eed ofgeleet hunn, sollen awer un dësen Dossiere schaffen, well ganz vill perséinlech Detailer dra sinn. D'Regierung wär net kategoresch géint eng App, wann den Zäitpunkt kënnt, wou se wierklech gebraucht géing ginn an effikass wär, géif ee sech net verschléissen, esou de Xavier Bettel.

De Premier huet sech an enger Fro vum Deputéierte vun de Pirate Sven Clement op en Neits skeptesch géintiwwer enger Corona-App gewisen. Et keng eenheetlech europäesch Warn-App, sot de Xavier Bettel. Eng Applikatioun misst dem Land awer eppes bréngen.

De Regierungschef huet sech an der Chamber och nees un d'Vollek geriicht an den Opruff gemaach, gutt opzepassen, gréisser Partye sinn ze loossen an déi sanitär Reegelen ze respektéieren.

Wat bréngt déi däitsch Corona-App zu Lëtzebuerg?

Zanter der leschter Woch kann een zu Lëtzebuerg déi däitsch Corona-Warn-App eroflueden an notzen. Ma wat bréngt déi däitsch Applikatioun fir eist Land? An wat sinn d’Eckpunkte vun der Corona-Warn-App? Dezentral ass wuel an dëser Debatt de wichtegste Begrëff. D’App zeechent op, wann een iwwert eng länger Zäit mat enger anerer App, also mat enger anerer Persoun, ouni déi néideg Distanz a Kontakt kënnt. Dës Date ginn awer nëmmen op de jeeweilegen Handye gespäichert, also dezentral.

Tracing-App - Reportage Monica Camposeo

Den Daniel Lücking ass zu Berlin Journalist bei der Zeitung Neues Deutschland an huet d’Entwécklung vun der Corona-Warn-App genee suivéiert: "Och eng Warnung gëtt nëmmen um eegene Smartphone festgestallt, esou dass d’Deplacementer net kënnen zeréckverfollegt ginn. Dat ass eng ganz gutt Léisung, well d’App ass jo fräiwëlleg."

Wann d’App eng Alert schéckt, soll ee sech méiglechst séier teste loossen. Esou solle Persounen, déi sech méiglecherweis ugestach hunn, méi séier kënnen detektéiert ginn an a Quarantän goen. Dat verhënnert, dass dës Persoune weider Leit ustiechen. Dëse Modell baséiert op d’Eegeverantwortung, erkläert de Prof. Claude Muller, Virolog beim Luxembourg Institute of Health: "Wann dir esou e Message kritt, da sidd dir verantwortlech, déi néideg Mesuren ze huelen oder eben net. Dat hänkt dann och vum Kader of, an deem déi App zu Lëtzebuerg géing genotzt ginn. An wann d’Leit net matmaachen oder d’App net eroflueden, da funktionéiert et net."

Och d’Kapazitéiten an de Laboe missten da sécher gestallt ginn, betount den Daniel Lücking: "Wann ee mat enger App-Warnung kënnt, dann muss och séier getest ginn. Fir dass Persounen, déi sech souzesoen an eng Selbst-Quarantän beginn, net ze laang op en Testresultat musse waarden."

Wie bis positiv getest gouf, kritt an Däitschland e Code, deen een a seng App androe kann, fir aner Leit ze warnen. Esou gëtt verhënnert, dass falsch Meldungen zirkuléieren. Ma hei ass awer schonn den éischte Problem fir déi Lëtzebuerger Notzer, seet den Damien Dietrich, Expert fir digital Technologien am Gesondheetswiesen (LIH).

"Et sollt een d’Applikatioun huelen a se e bësse veränneren, fir dass ee kann esou e Code aginn. Dat heescht, wann ech an de Labo oder bei den Dokter ginn a positiv getest ginn, da muss ech hei e Code kréien, deen ech an d’App kann aginn. Oder et misst een eben déi däitsch Codë benotzen, wat natierlech och eng Méiglechkeet ass."

Et wier awer immens wichteg, dass eng Tracing-App – egal ob mir déi däitsch mat notzen oder eng eegen entwéckelen – iwwer d’Grenzen eraus funktionéiert, do sinn sech déi dräi Experten eens. D’Applikatioun sollt dann och onbedéngt konform mam Dateschutz sinn, well dat d’Akzeptanz an der Bevëlkerung natierlech steigert. An nëmme wann e groussen Deel vun de Leit bereet ass, déi fräiwëlleg App erofzelueden an ze notzen, kann se och beim Tracage hëllefen.

Wéi funktionéiert déi däitsch Corona-Warn-App? Ass se och fir Lëtzebuerger Notzer sënnvoll? Dës an aner Froen iwwer déi däitsch App kënnt Dir am integralen Interview mam Daniel Lücking nolauschteren.

De kompletten Interview mam Daniel Lücking

Iwwer déi däitsch Corona-Warn-App a méi generell iwwer de Notze vun esou Tracing-Appen, respektiv d’Kriticken, schwätze mir och en Dënschdeg de Mëtten an eisem Thema vum Dag um 10 bis 6 hei op der Antenn.