Am RTL-Documentaire hu mir de Jan begleet, e jonke Mann, deen an der Pubertéit gemierkt huet, datt hien am falsche Kierper gebuer gouf.

De Jan huet 21 Joer, spillt Theater a léiert fir Infirmier. E jonke Mann, dee matzen am Liewe steet. Mä de Jan koum eigentlech als Jeanne op d’Welt. Spéit an der Pubertéit mierkt hien, dass eppes net stëmmt. Hie sicht nom richtegen Tirang fir sech. Lesbesch? Och dat huet net gepasst. De Jan realiséiert, dass hien am falsche Kierper gebuer gouf. Hie fillt sech als Jong, am Kierper vun engem Meedchen.

Hie vertraut sech sengem beschte Kolleeg Daniel un, erzielt sengen Elteren Martine a Sascha, wat mat him lass ass. An hie fänkt un, déi néideg Demarchen z’ënnerhuelen, fir zu deem Mann ze ginn, deen hien eigentlech wëll sinn. Hie renseignéiert sech op de sozialen Netzwierker, sicht Dokteren, déi hien op sengem Wee begleeden. Hie kritt eng nei Carte d’Identité mat sengem Jongen-Numm a fänkt un, Testosteron ze huelen. Doduerch gëtt seng Stëmm méi déif, hie kritt méi Hoer, säi Kierper verännert sech.

Mä hien dreemt dovunner, iergendwann eng Kéier ouni spezielle Maillot schwammen ze goen. Torse nu, esou wéi all déi aner Männer och. Dofir wëllt hie sech operéiere loossen. De Rendez-vous an der Klinik zu Reinbek bei Hamburg ass scho geholl.

Den Documentaire „Fräi Schwammen. Gebuer am falsche Kierper“ begleet de Jan bei dëser Operatioun. Et ass e sensibele Portrait, deen dem Jan säin Enthusiasmus a säi feste Wëlle weist, mä och seng Onsécherheeten. Et gi Momenter wéi d’Visitt beim Gynekolog, wou een och als Zuschauer spiert, wéi onwuel sech de Jan a senger Haut fillt. Et gi witzeg Momenter, beispillsweis, wann hien zesumme mat sengem beschte Kolleeg eng Penis-Silikon-Prothese auspéckt, déi hien sech am Internet bestallt huet. An et gi ganz perséinlech Momenter, wann hie mam Daniel iwwert säi Gefillsliewe kuerz virun der Operatioun schwätzt.

D’RTL-Journaliste Serge Pauly an Anouk Siebenaler, zesumme mat de Kameraleit Mike Elsen a Pedro Venancio, hunn de Jan wärend engem Joer begleet: beim Familljenowend, an der Schoul, beim Stage am Spidol, bei der Gay Pride zu Köln a bei der grousser Operatioun, wou de Jan sech vun allem getrennt huet, wat hien als Fra definéiert huet, also Brëscht, Gebärmutterh an Eeërstäck.

“Fräi Schwammen. Gebuer am falsche Kierper.” Realisatioun: Serge Pauly & Anouk Siebenaler. Kamera: Mike Elsen & Pedro Venancio. Montage: Claude Grosch. Net fir Kanner ënnert 12 Joer.

Den Documentaire gouf iwweregens 2019, also viru Corona an den entspriechende Restriktioune, gedréint.

E Bléck hannert d'Kulissen