De Staatschef huet déi lescht Covid-Restriktiounen de 24. Dezember zu Biarritz ënnerschriwwen, wat deels fir kritesch Diskussioune gesuergt huet.

D’Confinementsreegele géingen Deplacementer am Ausland net verbidden, ënnert der Konditioun, datt een d’Mesuren, fir an déi eenzel Länner anzereesen, respektéiert, sou d'schrëftlech Äntwert vum Service Presse vum Haff op eng Ufro vum 100komma7 hin, déi RTL-géintiwwer och nach emol bestätegt gouf, wann och eréischt en Dënschdeg den Owend um 21.18 Auer.

"LL.AA.RR. le Grand-Duc et la Grande-Duchesse passent en effet les fêtes de fin d’année ensemble à l’étranger. Le confinement n’interdit pas ce type de déplacement, sous réserve du respect des procédures d’entrée dans les pays concernés. S.A.R le Grand-Duc est en contact permanent avec le Gouvernement ainsi qu’avec ses collaborateurs de la Maison du Grand-Duc pour être informé et afin de remplir ses prérogatives constitutionnelles.

En vous souhaitant une bonne fin d’année.

Bien cordialement,

Le Service Presse"

Weider heescht et de Grand-Duc wier mat senger Fra am Ausland, fir d’Feierdeeg ze verbréngen, mä hie wier a stännegem Kontakt mat der Regierung a senge Mataarbechter, fir informéiert ze bleiwen a seng Aufgaben z’erfëllen.

An Holland huet de Kinnek Willem Alexander sech am Oktober no fermer Kritik wéinst enger Vakanz a Griicheland entschëllegt. Holland war deemools am Deel-Lockdown.

Och de Premier Xavier Bettel seet am RTL-Interview fir de Joreswiessel, et wier dem Grand-Duc säi gutt Recht an net verbueden ze reesen. Et wier méi geféierlech hei am Land mat 10 Leit ze feieren ewéi zu 2 zu Biarritz ze sinn.

„Wann de Grand-Duc mat senger Fra zu Biarritz eleng ass, gesinn ech guer kee Problem“, esou de Xavier Bettel.

De ganzen Interview mam Premier gëtt den 1. Januar um 19.30 Auer op der Tëlee diffuséiert. Op Wonsch vum Premier gouf den Interview e Méindeg 28. Dezember opgeholl.