E Freideg de Moie stellt den Educatiounsminister säin iwwerschafften Hygièneskonzept fir d'Schoule vir.

Wéi geet et mat de Schoulen weider, no der Fuesvakanz, den 22. Februar? Eng Fro, déi den Educatiounsminister e Freideg de Moien op enger Pressekonferenz um 11 Auer gekläert huet.

RTL-Informatiounen, am Virfeld vun der Pressekonferenz

Eisen Informatiounen no, ginn d’Schoulen no der Vakanz nees op, mat verstäerkte Protektiounsmesuren. Beispillsweis besteet vum 2ten Cycle un eng Maskeflicht, och wärend dem Cours.

Generell sollen och méi Tester an de Schoulen gemaach ginn.

Well et regional bei der Zuel vun de Fäll an de Schoul-Gebailechkeeten gréisser Ënnerscheeder ginn, gëllen deemno wéi och net déi selwecht Mesuren fir d’ganzt Land. Sou kéinten, wann néideg, A/B-Gruppen och am Cycle inférieur am Secondaire gëllen, ausser fir d‘7ièmen.

Eng aner Méiglechkeet bei méi héijen Zuelen an enger Schoul wär Presenzunterrecht just moies oder eng Woch Homeschooling virun der Ouschtervakanz. Wéi gesot géifen déi Moossnamen ergraff ginn, wann d’Situatioun et lokal oder an enger Schoul erfuerdert.

Aus engem Schreiwes, wat en Donneschdeg erausgaangen ass an dat eis virläit, geet ervir, datt d'Examensprogrammer fir d'Ofschlossklassen adaptéiert ginn. Den Ecrit gëtt an alle Fächer reduzéiert. Den Oral an deene Fächer, déi eng grouss Virbereedung brauchen. Alles an allem soll de Programm dem Educatiounsministère no am Prinzip ëm 15% gekierzt ginn. Prinzipiell solle Kapitelen, respektiv Themen ewechgelooss ginn. Do, wou dat net méiglech ass, géif déi eng oder aner alternativ Fro am Exame gestallt ginn. D'Delaien, fir d'Questionnairen ze finaliséieren, ginn deementspriechend ugepasst. Et bleift och derbäi, datt d'Schüler a Schülerinne vun der Première Presenzunterrecht gehale kréien.

Vill Ofschlossschüler hätte sech an de Gespréicher veronséchert gewise wéinst der aktueller sanitärer Situatioun an der Verbreedung vun neie Virus-Varianten, heescht et am Bréif vun der Education nationale.

D’Educatioun soll dann och aus dem generelle Covid-Gesetz ausgeklammert ginn a fir d’Maison Relaise gëllt méi e strikt Opdeele vun de Gruppen.