Hannergrond si verschidde Faiten a Relatioun mat engem Aarbechtskontrakt, deen de Frank Engel mat der ASBL CSV-Frëndeskrees hat.

RTL-Informatiounen no gouf den CSV-Parteipresident Frank Engel vu Parteikolleege beim Parquet denoncéiert. Hannergrond si verschidde Faiten a Relatioun mat engem Aarbechtskontrakt, deen de Frank Engel wärend siwe Méint 2020 mat der ASBL CSV-Frëndeskrees hat.

D'Associatioun huet dem Frank Engel eng Pai bezuelt vu 6.000 Euro Brutto, dat vu Juni u bis Dezember. Als Conterpartie huet de Frank Engel sech ënnert anerem engagéiert, Membere fir d'ASBL ze sichen an eng Fondatioun ze grënnen. Eise Sourcen no wier dat awer ni geschitt. Hien hätt deemno Sue kritt, fir e Kontrakt, deen hien net erfëllt hätt. Dowéinst kréich de Frank Engel elo ënnert anerem "Faux et usage de faux" reprochéiert. Dat op Basis vun engem Avis juridique vun engem Affekot, deen en Dënschdeg de Moien an der CSV-Fraktioun kontradiktoresch diskutéiert gouf.

Deen Avis koum ënnert anerem zur Konklusioun, datt CSV-Deputéiert, laut dem Artikel 23 vum Code de procédure pénale, d'Flicht hunn, dës Faiten, déi penal Elementer hunn, un de Parquet ze ginn. An deem Sënn ass am Laf vum Dënschdegnomëtteg e Bréif un de Procureur d'Etat gaangen. An dësem heescht et, datt de Kontrakt jee no Appreciatioun kéint als "Emploi fictif" gesi ginn.

Dee Bréif ass vun 13 ASBL-Memberen ënnerschriwwe ginn, dorënner eng hallef Dosen CSV-Deputéiert. RTL-Informatiounen no war d'Affär bei der Generalversammlung vun der ASBL CSV-Frëndeskrees virun enger Woch zu Hesper opgeflunn an huet fir en Eclat gesuergt, well ënnert anerem de Frank Engel reprochéiert krut, fir säin eegenen CDD selwer redigéiert gehat ze hunn. Mat dëse Reprochë confrontéiert, sot de Frank Engel, deen och President vun der ASBL ass, sech bereet, säi komplette Salaire ze rembourséieren.

Och Reporter.lu beschäftegt sech mat dëse Faiten an engem Artikel um Dënschdeg den Owend an huet och mam Frank Engel geschwat, dee confirméiert, fir ronn 40.000 Euro fir seng Missioun zejoert vun der ASBL krut ze hunn. Weider zitéiert den Online News Site den aktuelle Parteipresident mat de Wierder: "Ech si kee Verbriecher. Si wëlle mech lass ginn mat alle Moyenen".

En Dënschdeg den Owend sollt an deem Kontext och eng urgent Reunioun vum CSV-Nationalcomité sinn, ma dës gouf kuerzfristeg ofgesot.

De Frank Engel wëllt sech Enn der Woch am Kader vun enger Pressekonferenz zu de Virwërf äusseren, sou den CSV-President eis op Nofro hin.

D'Fraktioun wëll den Ament keng Positioun bezéien.

D'Fraktiounscheffin Martine Hansen huet sech e Mëttwoch de Moien um 7.30 Auer am RTL-Journal um Radio zu der Affär geäussert.