D'Decisioune vun de leschte Woche wieren déi richteg gewiescht, huet den Educatiounsminister en Donneschdeg virun der Press betount.

D'Schnelltester sollen Deel vun der Léisung an de Schoule sinn: Vun nächster Woch u soll all Schüler, Enseignant an Educateur an de Schoulen an an de Maison Relaisen eemol d’Woch mat engem Schnelltest getest ginn, sou den Educatiounsminister Claude Meisch en Donneschdeg de Moien op enger Pressekonferenz. Dat sinn 120.000 Tester d'Woch.

Schnelltester a Schoulen

De Groussasaz vu Schnelltester, gekoppelt um Large-Scale-Testing soll e Stéck méi Normalitéit an iergendwa méi Kontakter bei de Jonken erméiglechen, esou den Educatiounsminister Claude Meisch.

Mir erwaarden eis dofir an de Schoulen, bei de Schüler, bei den Enseignanten nach eng Kéier e Stéck méi Sécherheet fir d'Schoulen. Mir erwaarden eis dofir awer och méi Presenzunterrecht, dee ka garantéiert ginn, e Stéck méi sozial Kontakter tëscht deene Jonken ze erméiglechen an e Stéck méi Normalitéit an eisem Schoulbetrib."

D'Pilotphas virun der Ouschtervakanz wier dem Educatiounsministère no e Succès gewiescht. An enger éischter Phas haten déi lescht Woch am Mäerz bal 4.000 Schüler e Schnelltest-Kit kritt. Vun deene ware 4 Stéck positiv. Déi Woch drop war bei ronn 3.000 Tester just ee Schüler positiv getest ginn. Och an engem rezente Large-Scale-Testing, wou zu Déifferdeng 3.700 Schüler getest goufen, wiere just 10 positiv Fäll dobäi erauskomm.

Wat engem och eng Indikatioun gëtt, wéi niddereg déi Donkelziffer effektiv ass."

Zanter der 5. Woch, also ugangs Februar, vun dësem Joer sinn och an de Schoulen déi brittesch a südafrikanesch Variante méi present, dat géif och de radikalen Uwuess un Infektioune ronderëm d'Fuesent erklären.

Op der anerer Säit gesi mer awer, datt mer d'Situatioun awer konnten ëm Fuesent stabiliséieren. An et ginn eng ganz Rei Indicateuren, déi drop hindeiten, datt mer et gutt am Grëff haten déi leschte Wochen."

Eng rezent Entwécklung, déi de Responsabelen awer gréisser Froe stellt, ass déi, datt den Inzidenz-Taux sech den Altersklassen ugepasst huet, erkläert de Romain Nehs, responsabel fir de Secondaire am Educatiounsministère.

Wat mer gesinn unhand vun den Zuelen, dat ass, datt d'Vitess an de Volume vun den Transmissiounen zougeholl huet. Dat a quasi allen Alterskategorië vun der Schoulbevëlkerung."

Am Bilan vun de leschte Wochen, deen en Donneschdeg gezu gouf, gouf och den Cours op Distanz gelueft, dee méi Clusteren ëm d'Fuesent verhënnert hätt, awer just am Noutfall soll agesat ginn. En neie Stufeplang gouf iwwerdeems ausgeschafft, dozou gehéiert och d'Limitatioun vum Presenzunterrecht op e puer Stonne moies am Fall, wou d'Zuel vun den Infektiounen nees sollt drastesch unzéien.

Ma et wier een optimistesch, esou de Claude Meisch, datt d'Schouljoer gutt op en Enn kéint goen.

Schnelltester richteg benotzen