Um Sonndeg am Nomëtteg hu béid Gemenge via Communiqué d'Resultat vum Referendum matgedeelt.

Vun 2023 u sollen et just nach 101 Gemeng zu Lëtzebuerg ginn. Dat hunn e Sonndeg déi Walberechtegt zu Groussbus a Wal decidéiert. An engem Referendum, deen zanter 3 Joer an der Maach war, hu sech 70,52% vun de Leit zu Groussbus an 62,75% vu Wieler an der Gemeng Wal fir eng Gemengefusioun ausgeschwat.

Dem Gemengepapp an der Gemengemamm sinn nom auszielen allebéid e Stee vum Häerz gefall. D'Resultat ass méi däitlech ausgefall, ewéi geduecht, esou och den Buergermeeschter vu Groussbus, de Paul Engel.

Extrait Paul Engel

Ech sinn immens begeeschtert vum Resultat. Et gëtt engem Zouversiicht a weist och, datt d'Leit Vertrauen an eis gesat hunn, fir Defie vun der Zukunft zesummen unzegoen. Dat heiten ass elo enger wonnerbar Basis, fir elo weiderzeschaffen.

Et géif een hoffen, och de Leit,déi géint d'Fusioun gestëmmt hunn, an Zukunft vun der Attraktivitéit vun enger, méi grousser Gemeng ze iwwerzeegen.

An de lëschte 17 Joer goufen et 12 Gemengefusiounen. Et bleiwen der nach 102. En Trend, dee vum Inneministère ënnerstëtzt gëtt. Elleng 34 Milliounen Euro goufe fir déi 4 rezentste Fusiounen investéiert. 4,7 Millioune soll elo an Zukunft a Richtung Groussbus-Wal goen. Gréisser Projete sinn awer net an de Gemenge geplangt, wéi Christiane Thommes-Bach, Buergermeeschter vu Wal, erkläert.

Extrait Christiane Thommes-Bach

Mir hu Scholden, mir hu Projeten déi lafen. E Projet, deen awer warscheinlech kënnt an no deem d'Veräiner hei och froen, ass eng nei Sportshal. Dat ass en Zil, dat mer probéieren, zesummen ze areechen.“

Fir eng douce Transitioun ze garantéieren, soll bei de Walen 2023 an zwou Sektioune gewielt ginn an de Gemengerot fir eng Legislatur aus allkéiers sechs Vertrieder aus all Gemeng bestoen. Och de Schäfferot gëtt deen Ament 50/50 besat.