De Staatsrot gesäit mam neie Covidgesetz keng disproportionéiert Aschränkungen an déi individuell Fräiheeten.

E Freideg gëtt eng éischte Kéier an der zoustänneger Chamberkommissioun um Gesetzprojet geschafft, mat deem notamment den 2G-Regime an der Fräizäit a vum hallwe Januar un de Covidcheck-System fir jiddereen op der Aarbecht soll agefouert ginn.

Eng déck Woch no den Annonce vu Premier a Santésministesch läit elo den Avis vum Staatsrot iwwert den éischten Deel vum Gesetzprojet vir. Den 3G-System op der Aarbecht gouf vun der Héijer Kierperschaft nach net aviséiert. Den aktuellen Avis gëtt dem Parlament awer elo mol eng gutt Basis op där d'Deputéiert schaffe kënnen.

Avis Staatsrot Covidgesetz - Reportage vum Claude Zeimetz

De Staatsrot  gëtt also gréng Luucht fir de méi restriktive CovidCheck. Verfassungsrechtlech gesinn, hält den Text also d'Strooss. Op dat déi Minoritéit berouegt, déi géint déi annoncéiert Restriktioune Stëmmung mécht an hir Roserei zum Ausdrock bréngt, steet allerdéngs op engem anere Blat. Fir awer beim Staatsrot ze bleiwen... de limitéierten Accès fir Geimpfter a Persounen, déi de Covid schonn haten, géif déi individuell Fräiheeten am aktuelle Pandemiekontext net disproportionéiert aschränken, aktéiert déi Héich Kierperschaft. Et géif nämlech drëm goen, duerch de limitéierten Zougang zu Fräizäitaktivitéiten déi ëffentlech Gesondheet z'assuréieren. Den Zougang zu Fräizäitaktivitéite wier och weder essentiell nach e fundamentaalt Mënscherecht.

Dat neit Covidgesetz beweegt sech virum Hannergrond vun der aktueller véierter Well an der Decouverte vun der neier Omikron-Variant déi eis an den nächste  Méint nach méi dierft ze schafe maachen. Well bis elo nach ëmmer ronn e Véierel vun den Awunner iwwer 12 Joer net géint Covid geimpft ass, wëll d'Politik alles dru setzen, fir d'Impfungen z'acceleréieren, an de Gesondheetssystem oprecht z'erhalen.

D'Politik wier heifir gutt beroden nom Precautiounsprinzip ze verfueren, schreift de Staatsrot, och fir de gesetzleche Kader.

De Conseil d'Etat gëtt a sengem Avis ze bedenken, datt d'Mesuren nëmme kënnen effikass sinn, wann d'Reegelen och adequat kontrolléiert ginn a Verstéiss bestrooft ginn, notamment am Horeca oder fir Rassemblementer. Eng éischte Kéier soll mam neie Covidgesetz d'Méiglechkeet agefouert ginn, fir d'Identitéit vun de Persounen ze kontrolléieren, déi de Covidcheck virweisen. Och op dësem Punkt gesäit de Staatsrot kee Problem. Am Avis gëtt der Politik just mat op de Wee ginn, datt een dës Verifikatiounen net eleng mat der Identitéitskaart oder dem Pass soll kënne maachen. Mä datt d'Leit sech och solle kënne mat enger anerer Identitéitspièce, mat enger Foto drop ausweisen, wéi zum Beispill dem Führerschäin oder enger Studentekaart.

Bedenken huet de Staatsrot nach ëmmer beim Artikel, bei deem et ëm den Asaz vu Medikamenter geet, déi fir dee spezifesche Gebrauch nach keng Autorisatioun kruten. Sou wéi den Text den Ament formuléiert ass, dreet de Conseil d'Etat op en neits mat enger formeller Oppositioun.

Avis vum Collège Médical

Donieft läit zanter e Mëttwoch och den Avis vum Collège Médical vir. D'Doktere begréissen, datt d'Politik mat der Aféierung vum 2G-System an den Identitéitskontrollen den Drock op déi Ongeimpft erhéije wëll. D'Impfung wier nach ëmmer dat effikasste Mëttel, fir d'Pandemie am Grëff ze halen. Och gëtt vum Collège Médical begréisst, datt d'Tester manner laang gülteg sinn. D'Validitéit vun de Schnelltester geet op 24 Stonnen erof, déi vun de PCR-Tester op 48 Stonnen. D'Dokteren appreciéiere ganz besonnesch och, datt d'Regierung gesetzlech verankere wëll, datt d'Mineuren tëscht 12 a 15 Joer sech och da kënnen impfe loossen, wann och nëmmen ee vun hiren Elteren dat accordéiert.

Mineuren vu 16 Joer u solle guer keng Autorisatioun vun hiren Eltere fir d'Covidimpfung méi brauchen. Bis elo konnte Mannerjäreger bis 18 Joer sech nëmme mam Accord vun den Elteren impfe loossen.

E Freideg de Mëtteg um 15.30 Auer kënnt d'Santéskommissioun eng éischte Kéier zesummen, fir um Text ze schaffen. Dat neit Covidgesetz kéint, dem Rapporter Mars di Bartolomeo no, am warscheinlechsten en Donneschdeg de Mëtteg nom Enn vun de Budgetsdebatten déi aner Woch gestëmmt ginn. Den ablécklechen Text leeft den 18. Dezember aus.