E Sonndeg souz d'Regierung mat Vertrieder vu Gewerkschaften a Patronat zesummen, fir ze kucken, wat géint déi héich Inflatioun ka gemaach ginn.

Um éischten Dag vun den Tripartiteverhandlungen huet d’Regierung de Sozialpartner eng Deckelung vun den Energiepräisser proposéiert. D’Prioritéit vun der Regierung wier et, op d’Präisdeierecht anzewierken, esou den DP-Premierminister Xavier Bettel e Sonndeg den Owend um 22 Auer, no 8 Stonne Verhandlungen um Schlass zu Senneng.

1. Dag Tripartite: De Reportage vum Diana Hoffmann

Mir sinn nach net zu Accorde komm, sot de Premierminister wéineg iwwerraschend e Sonndeg den Owend. Hie war och deen eenzegen, dee virun de Mikro getrueden ass, an d’Haaptmesurë vun der Regierung, enger Präisbrems op d’Energiepräisser, presentéiert huet.

Xavier Bettel: "Déi géing eben och mat sech bréngen, datt een d’Inflatioun géing gebremst kréien. Ech mengen, datt dat och eng Direkthëllef wier fir d’Bierger, déi mat deenen nächste Rechnungen a mat den nächsten Avancen sech vill Suerge maachen. Dat wier eng direkt Äntwert. An awer och fir d’Betriber, well dat géing och d’Inflatioun bremsen an d'Kafkraaft vun deem eenzelen och manner schiedegen."

Um Sonndeg hätt een awer éischter eng Analyse vun der Situatioun gemaach. E Méindeg géing een nach eng Kéier e Calcul vum Statec zu der Propos virgeluecht kréien. Doriwwer eraus hätten d’Sozialpartner hir Propositiounen op den Dësch geluecht. D’Stëmmung wier gutt sot de Premier.

Xavier Bettel: "Ganz gutt. Also mir sinn eis net ëmmer eens, mee dat ass de Prinzip vun der Tripartite. Dofir dauert et och e bëssi méi laang. Et wier jo sou schéin, wann een no 5 Minutte fäerdeg wär. Mee jidderee kënnt mat sengen Interêten. D’Patronat huet aner Interête wéi d’Salariéeën. A bei eis geet et dorëm, datt een dem Land hëlleft, de Bierger hëlleft, an och d’Wirtschaft net fale léisst."

Et schéngt awer wéi wann et gréisser Divergenze ronderëm d'Indexfro, an dem verréckele vun Indextranchë géing ginn.

Xavier Bettel: "Jo, do ginn d’Meenungen och auserneen. Mee ech sinn net de Spriecher vun de Gewerkschaften oder vum Patronat. Et si Propositioune gemaach ginn. Mee si sinn sech net eens."

Weder d’Patronat nach Gewerkschafte wollten awer en offizielle Statement ofginn. Wärend de Premier der Press den Interview ginn huet, hunn d’Spriecher sech an der Däischtert aus dem Stëbs gemaach.

Staatsverscholdung

Dorop ugeschwat, op ee sech oneens an der Regierung wier, ob een un d'Limitt vun der Staatsverscholdung vu maximal 30 Prozent vum PIB fréckele geet, huet den Premier dann net direkt geäntwert, mee indirekt op den Koalitiounsaccord verwisen.

Xavier Bettel: "Mir hunn eis eng Limitt ginn. Et ass um Premierminister fir dorunner ze erënneren. D'Negociatioune sinn dobannen, mee wann een elo dat, wat mer eis als Grenz ginn hunn, ënnerschreit ier een erageet, dat ass net gutt."

Den LSAP-Sozialminister Claude Haagen hat sech awer, kuerz ier d'Tripartiteverhandlungen ugefaangen haten, an de soziale Medie geäussert, datt et elo kee budgetären Dogmatismus däerft ginn. Op dës Ausso ugeschwat, äntwert hien mat enger Géigefro.

Claude Haagen: "Sinn dann d'Maastrichter Krittären nach en Funktioun? Ech mengen se sinn net méi en Funktioun. Wann een sou déi aner Länner kuckt, an wann ech héieren wat mat de Maastricht-Krittären esou lass ass, ass dat jo net de Fall."

A Punkto Staatsverscholdung ass ee sech an der Koalitioun also net eens.

Am Virfeld vun de Verhandlungsronnen

Dem nationale Statistiksbüro Statec no sinn d'Präisser am Gaangen esou staark ze klammen, datt an den nächsten 10 Méint tëscht 2 a 4 Indextranche géinge fälleg ginn. Dat zousätzlech zu där, déi vun dësem Summer op nächsten Abrëll verréckelt gouf.

Tripartite um Sonndeg / Reportage Dany Rasqué

"An extremen Zäite mussen extrem Moossname geholl ginn", huet den Energieminister dës Woch am Kloertext op der Télé ënnerstrach. Sou änlech huet de Staatsminister Xavier Bettel dat dës Woch op alle Fall ausgedréckt, wéi hien no de bilateralen Entrevuë mat Patronat a Gewerkschaften d'Press informéiert huet.

"The Sky is not the limit, mir kënnen och net riskéieren, datt mer an eng Situatioun kommen, wou mer déi finanziell Stabilitéit vum Land géifen a Fro stellen."

Wat d'Hëllefsmesuren um Enn solle kaschten, dat wollt oder konnt de Premier dës Woch nach net soen. Fest steet awer datt déi ëffentlech Schold net iwwer 30 Prozent vum PIB soll klammen. " Et steet am Koalitiounsaccord, datt mer net iwwer 30 géife goen."

De Premier wier do, fir dofir ze suergen, datt e Koalitiounsaccord agehale gëtt, seet de Xavier Bettel. Hie fäert fir den Triple A, am Fall, wou d'Schold ze héich gëtt.

"Et wier geféierlech, wa mer den Triple A géifen op d'Spill setzen. Dowéinst muss ee kucken, wéi vill Sputt een huet, mä mir sinn eis bewosst, datt mer an dëser Situatioun elo net Spuer-Fetischist sollt sinn."

D'lescht Joer louch déi ëffentlech Schold bei 24,4 Prozent. Fir d'Presidentin vum OGBL ass kloer, datt d'Leit elo dringend Hëllef brauchen. D'Gewerkschaft hält weider um Index fest. D'Situatioun bei den Entreprisen ass an den Aen vun der Nora Back net esou dramatesch, wéi alt emol gär behaapt géif.

"Mir hu 70 Prozent vun den Entreprisen, den Donnéeën no, déi soen hir Aktivitéit ass stabil. 70 Prozent! 20 Prozent soe si klëmmt. Dat heescht mir sinn nach bei 10 Prozent, déi soen, se hätte manner Aktivitéit. Wat d'Bichelcher mat de Commanden ugeet, soen 90 Prozent si hätten e volle Carnet an 10 Prozent méi e schwaache Carnet an net Null."

D'Patronat interpretéiert déi aktuell Situatioun liicht anescht. De President vun der UEL, de Michel Reckinger, huet an der Woch dës Froen opgeworf.

"Wat brauche mer, wie brauch wat, fir dass en duerch de Bësch kënnt, da kucke mer, wat eis dat kascht an da kucke mer dono, wéi mer dat finanzéieren. Ech hu gesot, den Index, dat ass wéi eng Aspegic kéint Kappwéi awer eis Ekonomie huet de Schësser."

Deemno geet et vun e Sonndeg un um Sennenger Schlass drëms, déi richteg Pëlle fir jiddereen ze fannen. Diskussiounen, déi méiglecherweis och fir Kappwéi suergen.