Zesumme spueren - zesummen halen, geet den Appell duer fir duerch de Wanter ze kommen?

Wéi héich klammen d'Präisser nach vu Gas a Stroum, wat bedeit et fir Stéit a Betriber, wou a wéi muss de Staat asprangen a wéi gerecht verdeelen? D'Diskussioun iwwert eng Energiekris an onbekanntem Ausmooss, wou kee weess, wéi laang se unhält, wat nach geschitt an déi eis all lo scho belaascht.

Privatleit a Betriber fäerten ëm hier Existenz...

D'Energiekäschte sinn enorm héich an kee weess wéini d'Präisser ophalen ze klammen. Am Kloertext op der Tëlee huet den Energieminister um Donneschdeg Owend vun enger brutaler an extremer Situatioun geschwat. Hie weess, datt dringend Hëllef néideg ass an dat hunn och déi aner Invitéeën ënnerstrach.

Bei SUDenergie muss en duerchschnëttleche Stot fir Gas ronn 3.000 Euro d'Joer méi bezuelen, dat ass e Plus vun 110 Prozent. Den Direkter Alain Fürpass ass alarméiert: "Et ass eng Onsécherheet, et ass eng Angscht do. Verschidde Clientë sinn och net frou, mä haaptsächlech ass déi Angscht do. Wéi kann ech déi Suen nach opbréngen, fir déi Rechnungen ze bezuelen? Déi waren och bis elo scho ganz héich, well d'Kris ass virun engem Joer schonn ugaangen. Se huet net nëmmen elo mam Krich ugefaangen. D'Präisser ware scho laang héich an elo explodéieren se."

D'Caritas mierkt bei de Leit mat deene si ze dinn huet eng ënnerschwelleg Nervositéit, wéi d'Carole Reckinger sot. Si ass responsabel fir déi politesch Aarbecht. Nach wier et net sou kloer, wou et higeet: "Vill vun deene Leit vun deene mir schwätzen, déi kréien hier Decompten eréischt um Enn vum Joer. Dat heescht, déi kréien nach eng vill méi grouss Rechnung wa se a Residencë wunnen an dann alles beienee kënnt. Fir eis Leit, fir wierklech déi ënnescht Schichten hei zu Lëtzebuerg, do war Logement an iesse bis elo e grousse Problem, mä Energie war guer net um Radar."

Den europäesche Gewerkschaftsinstitut, seet d'Carole Reckinger, huet mat de Salairë vum Juli gerechent, wéi vill Deeg ee muss schaffe goen, fir seng Energiekäschten ze bezuelen. Mat engem Duerchschnëttsloun wieren dat zu Lëtzebuerg 14 Deeg. Mam Mindestloun 25.

D'CSV fuerdert als gréisst Oppositiounspartei eng séier Hëllef an eng Upassung vun der Steiertabell. De Co-Fraktiounspresident Gilles Roth: "Mir hunn nach ëmmer gesot, datt et net normal ass, datt wann d'Leit méi Kafkraaft brauchen, datt een dann keng Inflatiounsberengegung vun der Steiertabell iwwert déi lescht 5 Joer mécht. Dat bedeit, méi Steieren a méi Steieren an dëser Zäit ass fir d'Bierger net déi richteg Approche."

Wéi schwiereg Zäite sinn, weess den Energieminister Claude Turmes a versprécht, datt d'Regierung de Leit ganz séier ënnert d'Äerm gräift: "An extremen Zäite mussen extrem Moossname geholl ginn. Mir sinn am Gaang exzeptionell Moossname virzebereeden. Fir d'Stéit awer och fir d'Betriber."

Déi Moossname gi vun e Sonndeg un an der Tripartite diskutéiert.

D'Betriber hunn nach en anere Problem. Am Contraire zu de Privatleit, riskéiere si de Gas ofgeschalt ze kréien, wann et ganz eescht géif ginn. Virop wier do e Grupp vu 40 Industriebetriber betraff an d'Fedil, d'Stëmm vun der Industrie zu Lëtzebuerg, huet sech Gedanke gemaach, wéi een am Beschte géif virgoen. Hiren Direkter René Winkin: "Mir hätte léiwer, datt déi Grupp da linear, fir jiddereen d'selwecht, manner Gas ze gutt huet an duerno d'Méiglechkeet huet, datt de Betrib A, deen all säi Gas brauch, bei de Betrib B ka goen, fir deem en Deel vu sengem rechtleche Reschtgas ze verkafen. Domadder assuréiere mer eigentlech, datt et gerecht opgedeelt gëtt. Mir hunn en Incitant fir Alternativen ze sichen a mir suergen dofir, datt dee Reschtgas dee mer dann hunn, op déi Plaz kënnt, wou en am meeschte gebraucht gëtt."

An deem Sënn goufen et och Gespréicher mam Energie- a Wirtschaftsministère an de Plang an deem festgehale gëtt wie wéini ofgeschalt gëtt, soll Enn dës Mounts presentéiert ginn.

Eis Invitéë sinn

Claude Turmes
Minister fir Energie
Déi Gréng

RTL

© Eric Steichen

Alain Fürpass
Direkter SUDenergie

RTL

© Eric Steichen

Gilles Roth
Co-Fraktiounschef CSV

RTL

© Eric Steichen

Réné Winkin
Direkter FEDIL

RTL

© Eric Steichen

Carole Reckinger
Responsabel fir politesch Aarbecht Caritas

RTL

© Eric Steichen

Kloertext leeft am Prinzip all zweeten Donneschdeg um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay an am RTL Play nach eemol kucken oder consultéieren, respektiv kommentéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)