Déi aktuell Situatioun bei der Luxair, d'Aarbechtskonditiounen an och de Personal-Manktem: Dorëm goung et um Méindeg an der Aviatiounstripartite.

Aviatiounstripartite / Reportage Anne Wolff

Et gëtt kee Chômage partiel conjoncturel méi, de Plan de maintien dans l'emploi gëtt auslafe gelooss a vum anere Joer u sinn d'Paien net méi agefruer. Déi eligibel 44 Mataarbechter kënne weiderhi vun der Preretraite profitéieren. Ënner anerem dat sinn d'Resultater vun der Aviatiounstripartite.

D'Regierung, d'Luxair-Direktioun an d'Gewerkschafte souzen e Méindeg de Moien am Mobilitéitsministère beieneen.

All d'Säite schwätze vun engem konstruktiven Dialog, ma jiddereen ass sech bewosst, datt d'Fluchgesellschafte viru groussen Defie stinn, ënner anerem wat d'Moderniséierung vun der Flott a vum Cargozenter ugeet.

E Méindeg de Mëtteg gëtt et nach eng Reunioun mam Mediateur Robert Biewer, fir en éischte Point ze maachen. Hie gouf agesat, fir e Sozial-Dialog am Betrib anzeriichten, also Strukture festzeleeën, fir dass manner Spannungen tëscht dem Personal optrieden. Am Moment géifen et där eng Rëtsch tëscht dem Personal ginn.

Am Virfeld

Ënnert anerem gëtt jo kritiséiert, datt d'Personal vill ze vill Aarbecht hätt, an datt eng enorm Flexibilitéit géif gefuerdert ginn. Iwwert d'Paie wäert um Méindeg net diskutéiert ginn, wéi de Mobilitéitsminister Bausch schonn am Virfeld erkläert huet.

OGBL, LCGB an NGL-Snep haten am Kader vun de Gespréicher och eng Manifestatioun organiséiert.

Um 8.15 Auer de Moie goung et am Cortège vum Glacis, iwwert d’Rout Bréck bis bei de Mobilitéitsministère am Héichhaus. Dat huet dann och zu Perturbatiounen am Moiestrafic gefouert, nodeems déi Rout Bréck komplett fir den Trafic gespaart gouf. Eng 800 Leit hunn un dëser Maniff deelgeholl. D'Syndikater LCGB, OGBL an NGL-SNEP haten d'Personal mobiliséiert kritt. Géint déi aktuell Mëssstänn bei der nationaler Fluchgesellschaft gouf manifestéiert. Et géif u Respekt vis-à-vis vun den Employéeë feelen, d'Aarbechtskonditioune missten iwwerschafft an d'Paien adaptéiert ginn.

Virum Mobilitéitsministère hunn d'Gewerkschaftsvertrieder hir Riede gehalen.