Duerch d’Upassung vum Steierbarème u 4 Indextranchen op den 1. Januar géingen déi ënnescht Revenuen a Prozenter ausgedréckt am meeschten entlaascht ginn.

An Euroen ausgedréckt wieren et méi héich Revenuen, mee vun engem Brutto-Joresgehalt vun 150.000 Euro un ass de Montant, deen ee méi am Netto huet quasi plafonéiert. Donieft gi Leit an der Steierklass 1A, also gescheete Leit oder Wittmänner a Wittfraen, och liicht méi entlaascht ewéi Jonggesellen aus der Steierklass 1.

Ënnert anerem dat kann ee graff resuméiert aus de Beispiller erausliesen, déi de Finanzminister Gilles Roth en Donneschdeg de Moien der Chamberfinanzkommissioun presentéiert huet an duerno verëffentlecht goufen.

Ee Beispill weist, datt eng Koppel mat 2 Kanner an engem Brutto Joresgehalt vu 75.000 Euro, duerch d’Upassung vum Barème iwwert ee Joer 784 Euro manner Steieren op hire Salairë géing bezuelen, wat engem Minus vu ronn 15% entsprécht. Fir eng Koppel mat engem Kand an engem Joresgehalt vun 125.000 Euro wier et e Minus vu ronn 11% an an Euroen ausgedréckt bal 2.200 Euro méi am Netto.

Ze betounen ass, datt déi Beispiller sech eleng op Salairë bezéien. Se droe weder anere steierleche Mesurë Rechnung, nach anere Revenuen, déi ee kritt. Wéi vill Netto all eenzel Persoun Enn d’nächst Joer wäert gehat hunn, ka vu Fall zu Fall variéieren.

De Gilles Roth huet en Donneschdeg de Moien deklaréiert, d'Zil wier et de Barème op Dauer ganz un d'Inflatioun unzepassen.

Nei Steierbarèmen - Weider Beispiller vum Jean-Marc Sturm

Bei de Salariéen , fir just déi ze huelen, hu mer bis eppes iwwer 220.000 Euro " Revenu imposable" direkt emol bal zwou Dosen Basis-Echelone mat engem Steiertaux tëscht 0 an 42%. Derbäi 3 grouss Steierklassen: 1, 1A an 2 jee nodeem een als Jonggesell, Elengerzéienden oder kollektiv als Koppel mat oder ouni Kanner besteiert gëtt. Plus dann nach d'Fäll vu Wittfra-respektiv Wittmann oder nach gescheete Leit déi no 3 Joer reklasséiert ginn.  Déi ënnescht Revenuen ginn a Prozenter ausgedréckt am meeschten entlaascht. An Euroen ausgedréckt ass et fir déi méi héisch Revenue de Fall.

3 Fall-Beispiller: Ee Brutto-Revenu vu 50.000, 100.000 respektiv 125.000 Euro, ënnerdeelt an déi 3 genannte Steierklassen. 

Dat misst u sech ganz graff déi ominéis Mëttelschicht ëmräissen déi d'Politik esou schwéier definéiert kritt.

Bei engem Brutto-Revenu vu 50.000 Euro d'Joer bezilt een an Zukunft an der Klass 1, 876 Euro d'Joer oder eppes iwwer 13% manner. Am 1 A sinn et knapp 1.200 Euro d'Joer manner oder bal 20%.

Bei enger kollektiver Besteierung an der Klass 2 sinn et 286 Euro d'Joer oder 19,5% manner.

Huele mer ee Bruttorevenu vun 100.000 Euro d'Joer. Do sinn et an der Klass 1 ronn Minus 1.100 Euro d'Joer oder 4,6%. Am 1A sinn et 1.160 Euro manner oder 5%. Kollektiv an der Klass 2 bal 1.600 Euro d'Joer, ass gläich Minus 13,5%.

Dat geet da progressiv erop bis 125.000 Euro d'Joer brutto Revenue. Vun deem Niveau un ass ee quasi um Maximum vu manner Steieren ukomm, mat knapp 1.200 Euro d'Joer manner am 1. Ronn 1.260 Euro d'Joer am 1A a kollektiv am 2 bal 2.200 Euro d'Joer.

D’Upassung u 4 Indextranchen kascht de Staat ëm  480 Milliounen Euro d’Joer. De Gilles Roth huet de Moien deklaréiert d’Zil wier de Barême op Dauer ganz un d’Inflatioun un ze koppelen