Dem Paulette Lenert hiert Liewen huet duerch d’Covid-19 Pandemie immens changéiert. Vun engem Dag op deen aneren huet si misste Krisemanagerin ginn a gouf doduerch national immens bekannt. An eisem Format Politik a Pasta schwätze mir mat der nationaler Spëtzekandidatin vun der LSAP a léiere si och mol ganz privat kennen. D’Politikerin kacht ganz gären, mee aktuell huet e manner Zäit an et geet ee vrun allem vill an de Restaurant. Gekacht gëtt iwwregens e Plat, deen der Gesondheetsministesch immens schmaacht: Penne Carbonara Courgette.
Op d’Fro, wisou si déi richteg Premierministesch ass, äntwert d’Politikerin dem Loïc Juchem, datt si e Mënsch ass, dee gären nolauschtert, an der Ekipp schafft an och ëmmer Kompromësser sicht. Als immens haartnäckeg beschreift si sech. Et sinn hir éischt Walen, déi si als Kandidatin matmécht, a si wier awer schonn immens opgereegt. Et wier ongewinnt iwwerall déi vill Plakater vu sech selwer ze gesinn, mee si géing sech elo awer net geckeg maachen.
