Net schlecht gestaunt huet deen een oder aneren um Donneschdegowend. Eng 100 Leit si mat hirer Vespa am Pyjama gefuer.

Organiséiert gouf d’Aktioun vum Vespa-Tour am Pyjama vum Vespa-Club "Roude Léiw Lëtzebuerg". Et géif een dat elo schonn zanter e puer Joer maachen, esou de Jeff Tintinger, Sekretär vum Club.

De Vespa-Club Roude Léiw Lëtzebuerg ass ee vun de Vespa-Clibb aus dem Land. Si hunn hire Sëtz zu Reckeng op der Mess, donieft gëtt et e Club zu Bartreng an een zu Diddeleng. Donieft gëtt et de Vespa Club Lëtzebuerg an der Gemeng Suessem.

D’Sortie am Pyjama géif een aus Spaass maachen. "D’Leit sinn ameséiert a begeeschtert, wa se eis gesinn", erkläert de Jeff Tintinger. Wéi een zu Esch-Belval laanscht d’Police gefuer wier, déi grad Vitess-Kontrolle gemaach hunn, hätten d’Polizisten och ameséiert nogekuckt.

Den Tour ass duerch de Süde gaangen, vu Reckeng op der Mess bis op Déifferdeng, dann op Diddeleng an nees zeréck.