De 54 Joer ale Roberto Fani ass e Mann deen d’lëtzebuergesch Gastronomie zanter ville Jore präägt, hie war 2023 och Chef de l’année vu Gault&Millau ginn. De Roberto Fani ass 2015 op Lëtzebuerg komm, eigentlech mat engem anerem Projet am Kapp: Hie wollt als Consultant Restaurateure begleeden, déi hei am Land opmaachen. Mee et huet net laang gedauert, bis hie gemierkt huet: Hei ass nach Plaz fir säin eegent Konzept. Mat senger raffinéiert-italieenescher Kichen huet hien direkt de richtegen Nerv getraff – an 2017 gouf säi Restaurant zu Réiser och scho mat engem Michelin-Stär ausgezeechent.
Besonnesch ass un dësem Haus och den Duo hannendrun: De Roberto schafft Hand an Hand mat senger Fra, déi hien deemools an der Restauratioun kennegeléiert huet. 2025 huet d’Land 11 Michelin-Restauranten: 2 mat zwee Stären an 9 mat engem Stär. Zesumme beschäftegen dës Haiser iwwer Honnerte Léit u Personal, déi mat héijer Präzisioun an engem enk getakten Timing schaffen.
An enger Stärekichen muss net nëmmen all Teller bis an d’Detail geplangt sinn – och d’Organisatioun ronderëm, vum Service bis zur Logistik, spillt eng grouss Roll. De Chef-Kach huet dobäi eng Schlësselroll: hien ass gläichzäiteg Handwierker, Manager a Motivator. Et ass eng Aarbecht mat vill Drock, Verantwortung a Passioun. Am Restaurant “La Villa de Camille et de Julien” féiert e jonke Chef mat vill Talent an Ambitioun d’Kichen.
Hien huet eis awer och erzielt, datt et net ëmmer einfach ass, esou en Haus ze leeden - an sou stoung een och scho bal virum aus.
