En Donneschdeg de Moie war de Minister vun der Sécurité sociale eisen Invité vun der Redaktioun.

De generaliséierten Tiers Payant zu Lëtzebuerg kënnt an den nächste Joren, an dat phaseweis. Dat huet de Sozialminister Romain Schneider de Mueren am RTL- Interview erkläert.

Am Januar sollen et weider Detailer ginn.

Et geet jo drëm, datt d'Dokter-Rechnungen direkt vun der Gesondheetskeess iwwerholl ginn. D'Patiente solle finanziell entlaascht, an d'Doktere séier bezuelt ginn. Et wier souguer en Tiers Payant bis, wëll heesche fort vum Pabeier, hin zum Digitalen.

De Minister Romain Schneider ënnersträicht awer, datt den Tiers Payant och e groussen Defi ass. Dofir schafft och en extraen Experten-Grupp zanter Ugangs des Joers un där komplexer Matière.

Am Kontext Tiers Payant géif och den elektronesche Patientendossier vill hëllefen.

Dee Gesetzestext ass, nodeems den Avisen vum Staatsrot Rechnung gedroe gouf, nees um Instanzewee, sou nach de Sozialminister, deen och ënnerstrach huet, datt d'Stëmmung op der Quadripartite gutt war.

Invité vun der Redaktioun: Romain Schneider

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.