En Dënschdeg de Moie war den LSAP-Deputéierten Yves Cruchten eisen Invité vun der Redaktioun.

Lëtzebuerg misst Infrastrukture méi séier realiséieren, mä och méi wäit no vir kucken. Dat sot den LSAP-Deputéierten a Rapporter fir de Budgetsprojet 2020, Yves Cruchten, en Dënschdeg de Moien hei op der Antenn. Hien huet fir een Instrument plädéiert, wou ëmmer rëm déi nei Donnéeën opgeholl ginn, fir ze gesinn "wou musse mir wat maachen". Et wier net ze verstoen, datt 15 bis 20 Joer laang diskutéiert gëtt d'Diddelenger Autobunn dräispuereg ze maachen.

"Mir hunn hei zu Lëtzebuerg souwisou schonn e Retard opzehuelen", sou den Yves Cruchten. Et misst een agesinn, datt d’Land weider wäert wuessen. Dat wier kee politesche Choix, mä eng Realitéit. Mam Räichtum, dee geschaaft gëtt, misst op déi Problemer reagéiert ginn, déi de Wuesstem mat sech bréngen. Sief et am Verkéier oder am Logement, do hätt d’Politik nach Hausaufgaben ze maachen, sou den LSAP-Deputéierten.

D'Steiereform an de Klimapak sinn net am Budgetsprojet 2020 dran, mä dowéinst ass den Yves Cruchten net frustréiert. De Budget fir d’nächst Joer wier Mol d’Geleeënheet, fir en Otemzuch ze huelen a sech déi Froen ze stellen, déi ee sech soss vläicht ni géing stellen. Déi grouss Reforme géingen am Moment nach tëscht DP, LSAP an déi Gréng diskutéiert ginn. "Mir sinn awer nach net fäerdeg, sou datt mir nach näischt kënne chiffréieren", sou den Yves Cruchten. Tëscht de Regierungspartner ginn et Sträitpunkten, mä et wier eben d’Konscht dorausser e Konsens erauszeschielen. Den LSAP-Deputéierten ass opgrond vun der Erfarung vun de leschte Joren iwwerzeegt, datt déi 3 Parteien e gemeinsamen Nenner fannen.

Invité vun der Redaktioun: Yves Cruchten

Rendez-vous fir den Interview mam Invité vun der Redaktioun all Dag vu méindes bis donneschdes um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.