En Dënschdeg de Moie war de President vun der Stater LSAP eisen Invité vun der Redaktioun.

"Mir musse schaffen. De Leit eis Iddien nees méi no bréngen. Da kréie mer och e bessert Resultat bei den nächste Gemengewalen an der Stad". Dat sot de Gabriel Boisante en Dënschdeg de Moien am RTL-Interview.

Zanter leschtem Mount ass hien am Gemengerot an hien ass de President vun der Stater LSAP-Sektioun.

Där hir Prioritéite wieren eng ekologesch a mobilitéitsfrëndlech Stad, de Logement an de lokale Commerce, well dee wier wichteg fir d'sozial Kohesioun. D'Leit misste méi mat agebonne ginn an d'Leit misst een och siche goen. De Gabriel Boisante sot och d'LSAP misst sech och méi staark vun den anere Parteien ënnerscheeden a méi "Kante" weisen.

Obwuel déi méi interventionistesch Propose vun der LSAP bei de leschte Wale keng Friichte gedroen hunn - just 3 vu 27 Mandater am Stater Gemengerot – sou huet de Gabriel Boisante betount, d'LSAP wäert op kee Fall vun enger kollektivistscher Approche op eng individualistesch setzen.

Den neien LSAP-Gemengeconseiller huet a Bezuch zur schwiereger Lag vun de Geschäfter op der Gare wéinst dem Tram-Chantier gesot, d'Mesure vun der Gemeng géinge net duergoen. Hie huet Erliichterungen an der Trésorerie vun de Geschäfter gefuerdert.

Invité vun der Redaktioun: Gabriel Boisante

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.