E Freideg de Moie war d'Presidentin vun der Vëlosinitiative eis Invitée vun der Redaktioun.

An de leschten zwee Méint ware vill méi Leit mam Vëlo ënnerwee, virun allem och méi Famillje mat Kanner.

D'Loscht, fir Vëlo ze fueren, well kee Verkéier méi do war, muss elo genotzt ginn, fir zum Beispill Testphas fir nei Vëlosweeër ze maachen, Stroossen zouzemaachen a Vëlosschnellweeër z'organiséieren. Dat huet d'Presidentin vun der Lëtzebuerger Vëlosinitiative e Freideg de Moie bei eis op der Antenn gefuerdert. D'Monique Goldschmit war eis Invitée vun der Redaktioun.

An der Stad Lëtzebuerg si wärend dem Confinement d'Compteuren, déi d'Vëloen an der Woch zielen, zwar erofgaangen, ma de Weekend awer däitlech erop. Sou datt ënnert dem Stréch eng Hausse vun 8% notéiert gouf.

D'Moniqe Goldschmit huet op en Neits kritiséiert, datt et nach ëmmer ganz vill un der néideger Infrastruktur feelt. Wichteg wier e Vëlosreseau ze kréien, op deem ee gutt duerchgoend fuere kann. Bis elo wier awer nach kee politesche Wëllen do gewiescht, fir dat ëmzesetzen.

Stied wéi d'Stad Lëtzebuerg, Esch oder Ettelbréck géifen nach ëmmer keng Decisiounen huelen, fir dem Auto e Stéck ewechzehuelen. Dobäi misst virun allem eng nei Opdeelung vum Raum gemaach ginn. Den Ament géifen éischter méi Konflikter tëscht Vëlofuere a Foussgänger geschaaft ginn.

D'LVI erwaart sech, datt de Staat, wann och nëmme wärend dem Summer, sougenannte Pop-up-Vëlosweeër wéi am Ausland schaaft, dat heescht d'Stroossen, fir d'Autoen zoumaachen, déi da fir Cycliste reservéiert wieren.

Invité vun der Redaktioun: Monique Goldschmit

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.