En Donneschdeg de Moie war de Meris Sehovic eisen Invité vun der Redaktioun.

Et géif eng Onsécherheet bei de Leit gi wéinst der Pandemie. Dorausser dierft keng Angscht ginn, dat géif der Solidaritéit tëscht de Leit schueden, där Meenung ass de Meris Sehovic vun Déi Gréng.

Hie war Invité vun der Redaktioun den Donneschdeg de Moien am Virfeld vum digitale grénge Kongress, wou hie sech dem Vott, fir un der Säit mam Djuna Bernard d'Parteipresidence ze iwwerhuelen, stellt. Als integrativ Kraaft an der Gesellschaft hätten déi Gréng hei eng Roll ze spillen, fir de Leit Loscht op d'Zukunft ze maachen.

Et misst een d'Leit mathuele beim Kampf géint d'Pandemie an och géint de Klimawandel. Klimapolitik kéint een net vun uewen erof maachen.

D'Kris wier awer eng Chance fir méi Ëmweltschutz. Och hätten d'Leit gemierkt, datt ee misst méi Récksiicht huelen een op deen Aneren.

De Sëtzverloscht vun deene Gréngen an der leschter Sonndesfro gesäit de jonke Politiker als Momentopnam an enger aussergewéinlecher Situatioun. De Premier an d'Gesondheetsministesch hätten e gudde Match gemaach, ma och déi Gréng hätten an dëser Kris geschafft mat engem Logementsminister, deen derfir gesuergt hätt, datt d'Loyerspräisser dëst Joer agefruer an "aides au loyer" eropgesat ginn an enger Kulturministesch, déi e grousse Pak fir Kulturinstitutiounen ausgeschafft hätt. Derbäi géifen all déi Investitutiounshëllefen aus dem nationale Klima- an Energieplang kommen, déi elo Corona-bedéngt virgezu goufen.

Dee Plang misst elo stéckweis ëmgesat ginn andeems een d'Leit mathëlt. D'Corona-Pandemie hätt och déi positiv Dynamik beim Klimaschutz net ënnerbrach. Vläicht souguer verstäerkt. 12.000 Leit hätten eng Demande eragereecht, fir e Subside fir e Vëlo ze kréien an och den Undrang fir Photovoltaik-Subside wier grouss.

Déi gréng Regierungsmemberen hätten et an de leschte 7 Joer fäerdegbruecht, fir eng Akzeptanz fir progressiv Klimapolitik ze schafen.

D'Hausse bei den Accisen an um CO2 awer misst och kommen, sou de grénge Politiker den Donneschdeg de Moie bei eis op der Antenn. Awer net onbedéngt elo matten an der Kris. Et wier "vermiessen", fir elo matten an der Pandemie ze maache wéi wann näischt wier, sou eisen Invité vun der Redaktioun. All d'Mesurë géifen zesumme mat der Steierreform kommen.

De Politikwëssenschaftler Meris Sehovic huet 5 Joer un der Säit vum Claude Turmes am Europaparlament geschafft. Do hätt hie geléiert, Politik ze maachen. Zum Beispill Brécken zu aneren Parteien ze bauen. Ma och de Félix Braz an d'Carole Dieschbourg hätten hie gepräägt.

Invité vun der Redaktioun: Meris Sehovic

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.