En Dënschdeg de Moie war de President vun der Spidolsfederatioun eisen Invité vun der Redaktioun.

Vun 10 Hospitalisatiounen Enn Juni si mer bannent 14 Deeg elo schonn op iwwer 40. Dat wiere Chifferen, déi scho Suerge maachen. Et wier een awer op eng zweet Well preparéiert, dat huet de Paul Junck, President vun der Lëtzebuerger Spidolsfederatioun den Dënschdeg de Moien am RTL-Interview verséchert.

Et hätt een dat néidegt Protektiouns-Material prett: Masken, Tyvec-Kostümer an Desinfektiounsmëttel. An et kéint een op d'Erfarungswäerter vum Ufank vun der Kris bauen.

Een Defi bleift awer, genuch spezialiséiert Personal fir d'Spideeler ze fannen. Aktuell ginn et ronn 6.000 Soignanten. Tëscht 80 an 100 zousätzlech Leit ginn awer elo nach gesicht. Do wär een an Diskussioune mat der CNS, fir den néidege Budget ze kréien. Och laangfristeg géingen der vill an d'Pensioun goen an da wär et eng Erausfuerderung, genuch Leit ze mobiliséieren, sou den Direkter vun der Spidolsfederatioun FHL. Et géing awer net un de Sue leien, well am Verglach mam Ausland wär d'Remuneratioun am Spidolssecteur duerch de Kollektivvertrag gutt.

Et wier och wichteg, dass krank Leit wéissten, datt et sécher ass, fir an d'Klinik ze kommen. Och wann een eng aner Krankheet ewéi de Covid-19 huet. D'Spideeler wiere keng Virus-Schleideren an dat misst nach besser no bausse kommunikéiert ginn, well ee géing gesinn, dass elo vill Leit kommen, déi scho längst hätte missen traitéiert ginn an aus psychologeschen Ursaachen net an d'Spideeler komm sinn.

D'Spideeler si mëttlerweil nees op iwwer 80 Prozent vum normale Betrib. Wärend der Kris hätt een all net vital Aktivitéiten op 30-40 Prozent erofgefuer, och fir genuch Personal ze hunn. Dat wéilt een elo awer net méi sou maachen a just wann et muss sinn, cibléiert medezinesch Aktivitéiten eroffueren. Dofir mussen d'Hospitalisatioune sech awer natierlech a Grenzen halen, sou nach de Paul Junck vun der Federatioun vun de Lëtzebuerger Spideeler.

Invité vun der Redaktioun: Paul Junck

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.