En Donneschdeg de Moie war de Chamberpresident eisen Invité vun der Redaktioun.

Et war am Fong alles anescht – et huet mussen ëmgeduecht an d’Chamber nei opgestallt ginn. D'Chamber war seele sou gefuerdert wéi an de leschten 3 bis 4 Méint. Et huet missen ëmgeduecht ginn, et hu misse Videokonferenzen organiséiert ginn an et ass vum Krautmaart an de Cercle geplënnert ginn.

D'Covid-Gesetzer wieren e legislativen Héichpunkt gewiescht. Nach hi hätten d'Riedercher tëscht Regierung, Chamber a Staatsrot sou intensiv gedréint a sou gutt anenee gegraff. Fir d'Deputéiert ass et och eng aner Summervakanz ewéi gewinnt. D'Chamber bleift operationell a wäert zu all Moment kënnen zesummekommen, sou de President. Et wier ee voll reaktiounsfäeg, sou de Chamberpresident en Donneschdeg de Moien zu der parlamentarescher Aarbecht wärend der Corona-Kris. De Fernand Etgen war eisen Invité vun der Redaktioun.

D'Kritik vun der Oppositioun, datt d'Chamber wärend dem Etat de crise net genuch vun der Regierung informéiert gi wier, wëll de Fernand Etgen net sou stoe loossen. Wat d'CSV-Attacken op seng Persoun ugeet, do seet de Fernand Etgen, datt do Fake News verbreet gi wieren. Datt d'Urgence vu parlamentaresche Froe systematesch net unerkannt gi wier, dat wier net richteg, et hätt een dat dono alles nogekuckt.

Et wier vu verschiddenen CSV-Acteure méi einfach gewiescht, de Mann ze spillen ewéi mat sachlechen Argumenter ze punkten, den Toun wier inakzeptabel gewiescht an och net politesch korrekt, sot hien zu der perséinlecher Attack vum CSV-President Fränk Engel, dee vun enger Entwierdegung vum Presidentestull an der Chamber geschwat huet. Hie wéilt dat net weider kommentéieren, mä et hätt sech bis haut nach kee bei him entschëllegt, sou de Chamberpresident.

Invité vun der Redaktioun: Fernand Etgen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.