E Mëttwoch de Moie war de President vun der Fondation pour la Mémoire de la Shoaheisen eisen Invité vun der Redaktioun.

Méi wéi 75 Joer nom Enn vun der Besatzungszäit ënnerschreiwen d'jiddesch Communautéit an d'Regierung de Mëttwoch de Mëtteg e wichtegen Accord.

Et geet ëm Entschiedegunge fir d'Spoliatiounen an de 40er Joren.
Et wier ganz kloer, datt op Initiativ vun de Nazien d'Judde Verméige geklaut kruten, dat sot de President vun der Fondation pour la Mémoire de la Shoah, François Moyse, de Mëttwoch de Moien am RTL-Interview.

Mat engem Gesetz vun 1950 hate just d'Judde mat Lëtzebuerger Nationalitéit e Recht op Reparatiounen, déi aner wiere vergiess ginn.
Et wier vläicht wärend Joerzéngten en Tabu gewiescht, fir eng historesch, eng neutral Recherche ze maachen. Ma donkel Säite kéint een awer net ewech wëschen.

D'Lëtzebuerger Asiicht an dëser Saach wier spéit komm, 20 Joer hätt een no engem Accord gesicht, fir dëst Leed unzëerkennen.

Ënner anerem huet d'jiddesch Communautéit an de Gespréicher an der zoustänneger Verhandlungskommissioun gefuerdert, datt d'Sue vun de sougenannte Schlof-Konten un d'Fondatioun ginn, fir Recherchen ze maachen.

Lo läit en Accord mat der Regierung um Dësch. En Accord, mat deem een zefridde wier, sou nach de Maître Moyse.

Invité vun der Redaktioun: François Moyse

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.