En Dënschdeg de Moie war de President vun der Bauerenallianz eisen Invité vun der Redaktioun.

D'Lëtzebuerger Landwirtschaft wier scho ganz wäit, wat den Ëmweltschutz ugeet. Déi nei Reform vun der Europäescher Agrarpolitik wier och just eng Weiderféierung vun de Reforme vu virdrun, just mat méi Gewiicht eben um Ekologeschen. Dat huet de Camille Schroeder, President vun der Bauerenallianz, en Dënschdeg de Mueren am RTL-Interview erkläert.

E Véierels vum Gesamtbudget, also 25 Prozent wat de Landwirten op EU-Niveau ausbezuelt gëtt, gouf jo elo un ekologesch Critèrë gebonnen. Dat géif de Lëtzebuerger Baueren awer keng Suerge maachen, well bal 90% vun de landwirtschaftleche Flächen am Grand-Duché schonn an esou Programmer sinn. Deemno missten elo just Adaptatioune gemaach ginn, fir déi Programmer unzepassen. Et misst een ëmmer nees widderhuelen, dass Lëtzebuerg scho vill méi wäit wär wéi seng Nopeschlänner. Fir d'Baueren hei am Land wieren déi Ëmwelt-Programmer näischt Neies, well déi lescht Joerzéngte wier hei am Land scho vill geschitt.

Wéi eng Landwirtschaft wëlle mer hei zu Lëtzebuerg?
EU-wäit gekuckt bleiwen an Zukunft de Gros vun de Subventiounen un d'Fläch gebonnen, dat heescht grouss Betriber kréien däitlech méi Sue wéi kleng Betriber. 80 Prozent vun de Sue géingen u just 20 Prozent vun de Betriber goen. Zu Lëtzebuerg ass dat awer anescht, well mer vill méi mëttelgrouss Betriber hunn, sou eisen Invité. Et misst ee sech einfach d'Fro stellen, wéi eng Landwirtschaft een hei am Land wéilt. D'Bauerenallianz géing sech ganz kloer nach ëmmer fir de Familljebetrib ausschwätzen. Et wéilt ee keng ganz grouss Betriber an dofir misst een an der Landwirtschaftspolitik onbedéngt – wéi och de Landwirtschaftsminister ëmmer nees géing soen – d'Ökologie, d'Ekonomie an dat Soziaalt promouvéieren. Et misst een einfach eng Kéier definéiere a wéi eng Richtung ee wéilt goen, a bis wouhinner een nach als klenge Betrib gëllt. Et kéint net de Sënn an Zweck sinn, dass Betriber missten x-100 Kéi hunn fir kënnen z'iwwerliewen. Et wär een aktuell an engem Däiwelskrees, an do misst een onbedéngt nach eemol driwwer diskutéieren, esou de Camille Schroeder. E Familljebetrib wär iwwregens bis ewell ëmmer definéiert gi mat bis zu 100 Kéi, präziséiert den Invité.

Corona-Pandemie gutt iwwerstanen

An der Corona-Pandemie hätten d'Landwirtschaftsbetriber ganz disziplinéiert geschafft. Et gouf sech un d'Corona-Reegele gehalen a gläichzäiteg hätt een d'Liewensmëttelproduktioun weiderhin assuréiert. D'Regaler wären ëmmer voll gewiescht, wat keng Selbstverständlechkeet wier, sou eisen Invité. Och d'Präisser wäre relativ stabel bliwwen, sou datt d'Landwirtschaft relativ gutt duerch d'Pandemie komm ass, seet de Camille Schroeder vun der Bauerenallianz.

Invité vun der Redaktioun: Camille Schroeder

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.