Wirtschaftsminister bereet fir Eenzelgespréicher mat Sozialpartner
E Freideg de Moie war de Sozialdialog Thema an der Emissioun "Invité vun der Redaktioun".
De Sozialdialog huet Schwieregkeeten. Mä mir hunn et fäerdeg bruecht, nees all d’Säiten un en Dësch ze kréien, awer mam Resultat, datt mer net op e gemeinsamen Nenner komm sinn, dat sot e Freideg de Moien den DP-Wirtschaftsminister Lex Delles am RTL-Interview.
Et gouf jo keen Accord no den dräi Sozialronnen. Et hätt een e beschtméigleche Konsens gesicht, well kee Konsens méiglech gewiescht wär.
De Lëtzebuerger Modell wär wichteg. Et wär wichteg mateneen ze schwätzen. Wann net zu dräi, dann zu zwee. Et wéilt een an den Eenzelgespréicher probéieren nees zu engem dräier-Modell ze kommen. Et géif jo drëms goen, fir nohalteg Léisunge fir d’Land ze sichen.
De Lex Delles huet och drun erënnert, datt een de Gewerkschaften direkt entgéint komm wär mat de Kollektivverträg, d’Patronat war doriwwer net frou.
Ferm Kritik un deem, wat festgehale gouf, gouf et och vun de Jonken Demokraten, also der Jugendorganisatioun vun der DP. De Minister Delles hat de Marc Spautz an der Vergaangenheet wéinst seng Remarke kritiséiert. D’Jonk Demokrate wären eng eegestänneg Organisatioun, wou hien net géif dra schwätzen, huet de Lex Delles gemengt. D’Jugend géif aner Iwwerleeunge maachen.
Rendez-vous fir den Interview mam Invité vun der Redaktioun all Dag vu méindes bis freides um 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.
