E Mëttwoch de Moie waren ënner anerem d'Sozialronnen Thema an der Emissioun "Invité vun der Redaktioun".

D'Regierung hätt hier Decisioun scho virun der drëtter Sozialronn geholl, dës wier dowéinst ëmsoss gewiescht. 
 
A well de Comité Permanent du Travail et de l'emploi, de CPTE, eng Zort kleng Sozialronn ass, hätt et fir d'Gewerkschafte kee Sënn méi, an deem Format wieder ze verhandelen, sou d'OGBL-Presidentin Nora Back am RTL-Interview e Mëttwochmoien.
 
E weidere Grond, firwat d'Gewerkschaften net méi an de CPTE kommen, ass, datt an de Sozialronne keen Accord fonnt gouf.
 
Et wier normal, datt d'Positiounen ausernaner léichen, ma d'Regierung wier dem Patronat ugangs ze vill entgéintkomm, an dat hätt d'Situatioun vergëft. Wat an der Sozialronn festgehale gouf, wier zwar manner schlëmm wéi dat, wat am État de la nation presentéiert gouf, et géif awer net duer goen.
 
D'Gewerkschafts-Unioun hätt sech am meeschten kompromëssbereet gewissen an et wier een och nach ëmmer fir de Lëtzebuerger Sozialmodell, fir d'Tripartite, wann um Enn en anstännegen Accord eraus kéim.
 
D'Gewerkschaften hätte ganz vill Iddie wat d'Aarbechtszäitorganisatioun ugeet a wäerten déi och der Regierung ënnerbreeden, de Leit presentéieren an - wann néideg - och mat gewerkschaftlechen Aktioune verdeedegen, sou d'OGBL-Presidentin.
 
D'Nora Back begréisst awer och, datt d'Regierung prett wier an den, vun de Gewerkschaften gefuerderten, Bipartite weider ze diskutéierten.

Invité vun der Redaktioun: Nora Back

Rendez-vous fir den Interview mam Invité vun der Redaktioun all Dag vu méindes bis freides um 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.