Ënnert anerem dat waren d'Sujeten am Presseclub e Sonndeg tëscht 11 an 12 Auer op Radio Lëtzebuerg an am Livestream op RTL.lu.

Der Jugend gëtt alt nogesot, keng politesch Meenung ze hunn oder sech net der Däiwel fir hir Zukunft z'interesséieren: E Freide virun enger Woch hu Schüler aus allen Ecker vum Land dunn awer gewisen, dass si sech séier wuel fir eppes asetze kënnen. Dausende vun hinne waren an d'Stad komm, fir sech, nom Beispill vun der schwedescher Schülerin Greta Thunberg, fir de Klima staark ze maachen a konkret Aktioune vun der Politik ze fuerderen. Deemno hunn, wann och mat engem gewësse Retard, déi sougenannt "Fridays for Future"-Protester och de Grand-Duché erreecht. Mä ass et domat gedoen oder muss et zu weidere Manifestatioune kommen? Doriwwer huet d'Journalisteronn diskutéiert.

Déi hunn donieft nach iwwer d'Europawale geschwat, en vue vun deenen déi eenzel Parteien hei am Land hir Lëschten zesummen hunn, iwwert d'Trauerspill ëm de Brexit an iwwer d'Policegewerkschaft, déi e Méinden op hirer Generalversammlung d'schwéier Artillerie géint d'Direktioun an d'Politik erausgeholl hat, wat déi net op sech sëtze gelooss an zréckgeschoss hunn.

D'Invitéen am RTL-Presseclub waren:

de Christoph Bumb vu reporter.lu,
de Claude Karger vum Journal,
den David Marques vum Quotidien
an de Marc Schlammes vum Lëtzebuerger Wort

AUDIO: De Presseclub vum 24.3.19

De Presseclub héiert Dir all zweete Sonndeg kuerz no 11 Auer op RTL Radio Lëtzebuerg an am Livestream op RTL.lu, wou Dir d'Emissioun dono och an der Rubrik Radio bei den "Emissiounen" fannt.