Ënnert anerem dat si Sujeten am Presseclub e Sonndeg tëscht 11 an 12 Auer op Radio Lëtzebuerg an am Livestream op RTL.lu.

Iwwert d'Projete Google a Fage, den Accord zu de Schaff- a Rouzäite bei der Police an de sougenannte geheime Casier geet a ronn enger Stonn am Presseclub Rieds.

Duerch en Astellungsgespréich fir e Posten an der Justiz ass viru Wochen op eemol vun engem sougenannte „geheime Casier“ Rieds gewiescht. De Mann, deen dës Plaz a sengen Ae wéinst klenge Faiten aus der Vergaangenheet net krut, goung bei de Me Vogel, deen de Steen un d'Rulle bruecht huet. Virun allem d'politesch Oppositioun vun CSV an ADR ass op den Zuch opgesprongen an huet déi zoustänneg Ministere Felix Braz a François Bausch mat parlamentaresche Froe bombardéiert. Déi gréng Politiker koumen an eng Sëtzung vun den zoustännege Chamberkommissiounen, Police a Justiz hunn informéiert, ma d'Politik ass sech zimlech eens: Et muss zu spezifeschen Nobesserungen am Kontext vum Dateschutzgesetz vun zejoert kommen. Hu mer et hei mat engem handfeste Skandal ze dinn oder éischter mat engem Stuerm am Waasserglas? Doriwwer diskutéieren dono nees 4 Journalistekollegen.

Mir schwätzen donieft nach iwwert den Accord zu de Schaff- a Rouzäite bei der Police, dee virun allem de Virleefer schéngt ze si fir eng noutwendeg Opstockung vum Personal, an iwwert d'Projete Google a Fage, déi alle béid eng Hürd geholl, awer och schonn - am Fall Google - fir politesch Kollateralschied gesuergt hunn a weiderhi kontestéiert sinn.

Doriwwer hunn dës Invitéen am RTL-Presseclub diskutéiert:

de Christoph Bumb vu reporter.lu,
de Claude Karger vum Journal,
de Robert Schneider vum Tageblatt,
an d'Dani Schumacher vum Lëtzebuerger Wort.

AUDIO: De Presseclub

De Presseclub héiert Dir all zweete Sonndeg kuerz no 11 Auer op RTL Radio Lëtzebuerg an am Livestream op RTL.lu, wou Dir d'Emissioun dono och an der Rubrik Radio bei den "Emissiounen" fannt.