Ënnert anerem dat waren d'Sujeten am Presseclub, e Sonndeg tëscht 11 an 12 Auer op Radio Lëtzebuerg.

Déi lescht Wochen um Krautmaart goufe vun zwou Rieden dominéiert: dem Etat de la Nation an dem Depot vum Budget an der Chamber. An doriwwer war och am Presseclub rieds. D'Journalisten hu sech net reng op de Contenu limitéieren. Dat géing nämlech näischt bréngen, well de Contenu deen een äifreg sicht, gouf et häerzlech wéineg. Vill Floskelen: jo. Ma grouss Annoncen an Déifgang: nee.

Mir hu mat de Journalisten driwwer geschwat, wat si sech vum Etat de la Nation erwaart hätten a wéi si déi aktuell Regierungspolitik analyséieren. Firwat goufen et keng konkret Léisungen a firwat verstoppt sech eng Regierung hanner laangfristegen Ziler, amplaz elo e Kompass ze ginn an ze soen wou et higeet?

Och de Budget hu mer méi kritesch ënnert d'Lupp geholl. De Klimawandel gëtt als Haapterausfuerderung deklaréiert, ma trotzdeem suivéiert och de Budgetsprojet dem Credo "ëmmer méi wuessen".

D'Journalisten hu versicht déi aktuell Politik méi global z'analyséieren an dat elo gutt ee Joer no de Chamberwalen an enger 2. Oplo vun der blo-rout-grénger Koalitioun. Firwat ginn d'Suerge vun de Bierger net adresséiert? Gëtt et eng Veraarmung vum politeschen Discours? Gëtt d'Taktik vun der Politik hannert zouenen Dieren nees populär? An huet dës Koalitioun iwwerhaapt nach e gemeinsame Projet?

Ganz zum Schluss vun der Emissioun koume mer wéi gewinnt, op de Brexit ze schwätzen. D'Hoffnung op een Accord war nom EU-Conseil do, e Samschdeg huet de Boris Johnson awer dunn, op Demande vum Parlament, eng Verlängerung ugefrot. Kann een optimistesch sinn oder net?

Et hu matdiskutéiert:

d'Dani Schumacher vum Wort
mam Pol Schock vum Lëtzebuerger Land
dem Claude Karger vum Journal
an dem Raymond Klein vun der Woxx

Presseclub vum 20.10.19

De Presseclub héiert Dir all zweete Sonndeg kuerz no 11 Auer op RTL Radio Lëtzebuerg an am Livestream op RTL.lu, wou Dir d'Emissioun dono och an der Rubrik Radio bei den "Emissiounen" fannt.