Ënnert anerem dat waren d'Sujeten am Presseclub, e Sonndeg tëscht 11 an 12 Auer op Radio Lëtzebuerg.

Iwwer Rumouers an der adr, Onstëmmegkeete bannent der CGFP an d'Sonndesfro goung am Presseclub Rieds.

Regierungsparteien, déi an der Chamber keng Majoritéit méi hätten, an d'adr, déi mat engem Plus vun zwee Sëtz de grousse Gewënner wär: Dat waren d'Haapterkenntnisser, déi een aus der jéngster Sonndesfro vun RTL a Lëtzebuerger Wort konnt zéien. DP an LSAP géifen deemno ee Sëtz verléieren, wann haut géif gewielt ginn, déi Gréng ee bäikréien, och d'CSV hätt ee Mandat manner. D'adr - wéi gesot - der zwee méi, a fir déi Lénk an d'Pirate géif sech näischt änneren. Eng weider Konklusioun war déi, dass just eng Zweeër-Majoritéit méiglech wär, déi awer och just ee Sëtz am Plus wär. Ass zu Lëtzebuerg d'Zäit vun enger Koalitioun tëscht zwou Parteien eriwwer? Doriwwer hu mer ënner Journalistekolleegen diskutéiert.

Mir hunn donieft iwwert Onstëmmegkeete bannent der CGFP geschwat, dat am Zesummenhank mat der Affär ëm de President vun der Arméigewerkschaft Christian Schleck, wéinst där et Zodi tëscht Ënnerorganisatioune gëtt, an iwwer Rumouers an der adr, dat an der Suite vun engem Facebook-Post vum Sylvie Mischel, deen zwee vun de staarke Männer verurteelt haten.

Invitéen e Sonndeg waren:

De Richard Graf vun der woxx,

de Claude Karger vum Journal,

den David Marques vum Quotidien,

an d'Dani Schumacher vum Lëtzebuerger Wort.

De Presseclub vum 15.12.19

De Presseclub héiert Dir all zweete Sonndeg kuerz no 11 Auer op RTL Radio Lëtzebuerg an am Livestream op RTL.lu, wou Dir d'Emissioun dono och an der Rubrik Radio bei den "Emissiounen" fannt.