Ass Lëtzebuerg beim Virgoe géint Corona um richtege Wee? Kënnen déi schlecht ekonomesch Nouvellen aus de leschte Wochen ofgefierdert ginn?

A gëtt d'Steiergerechtegkeet de grousse Sujet vun den nächste Walen?

De Coronavirus ass a bleift och no der Summervakanz en Thema, an aus där Vakanz goufen eng Rëtsch Infektioune matbruecht. Deenen hir Zuelen hunn an de leschten Deeg a Woche souguer nees sou ferm zougeluecht, dass, nieft der Schwäiz, och eis Noperen Däitschland an d'Belsch eist Land nees als Risikogebitt ugesinn, mat all den negative Konsequenzen, déi dat huet.

Heiheem gouf et an de leschten Deeg Ongereimtheete wéinst der sougenannter partieller Quarantän an de Schoulen, am Fall, wou just eng Schülerin oder ee Schüler aus enger Klass infizéiert ass; do huet sech ë.a. vu Säite vun de Gewerkschaften d'Fro gestallt, wéi et a sou engem Szenario mam Léierpersonal a mam Rescht vun de Schüler ass.

D'Chamber huet iwwerdeems dës Woch en neit COVID-Gesetz gestëmmt. Huet d'Regierung d'Situatioun am Ufank vum Hierscht am Grëff, geet et mat den aktuelle Mesuren duer oder muss d'Schrauf e bëssen ugezu ginn?

Mir hunn donieft iwwert d'Ekonomie geschwat, aus där et ë.a. d'Nouvellë gouf vum Ofbau vun Aarbechtsplaze bei ArcelorMittal a St Paul a vum Rejet vu Fage fir de Projet vun enger Jugurtsfabrick tëscht Beetebuerg an Diddeleng, an iwwer Steiergerechtegkeet, e Sujet, dee fir verschidde Politiker zum Haaptthema vun den nächste Chamberwale kéint ginn.

Virun 10 Deeg war jo d'Nouvelle komm vun engem Sozialplang fir 80 Leit bei Saint-Paul, dem Mammenhaus vum Lëtzebuerger Wort. De Réckgank vun den Annoncë war een Haaptgrond fir dës Ukënnegung, an an Zukunft géif prioritär op dat Digitaalt gesat ginn, hat et geheescht.

De Rédacteur en chef adjoint Marc Schlammes sot am am Presseclub, et misst ee fir d’éischt ofwaarden, wat konkret beim Sozialplang erauskënnt an da kucken, wat een da wéilt maachen.

Zum Zäitpunkt vun der Annonce, hätt d’Redaktioun scho méi laang un engem Konzept geschafft a war och am Gaang, dat ëmzesetzen. Wa bis gewosst wier, wéi vill Leit nach do bleiwen, misst ee kucken, ob et dann nach ëmmer ëmsetzbar wier.

Extrait Marc Schlammes

Am Fréijoer war St Paul vum belsche Grupp Mediahuis opkaf ginn.

D'Invitéë waren:

Claude Karger vum Journal,
Marc Schlammes vum Lëtzebuerger Wort
Robert Schneider vum Tageblatt.

Presseclub vum 27. September

De Presseclub héiert Dir all zweete Sonndeg kuerz no 11 Auer op RTL Radio Lëtzebuerg an am Livestream op RTL.lu, wou Dir d'Emissioun dono och an der Rubrik Radio bei den "Emissiounen" fannt.