Mat 25 Joer huet de Ryan Johansson schonn eng beweegten Zäit als Profi hannert sech. De gebiertege Lëtzebuerger huet seng Karriär bei Bayern München ugefaangen, éier et hien ënner anerem bei Sevilla, Fortuna Sittard, den SC Freiburg a Wehen Wiesbaden verschloen huet.
Mëttlerweil spillt hie fir Preußen Münster an der 3. Bundesliga.
Déi vill Wiessel tëscht verschiddene Länner a Veräiner hunn et dem Johansson net ëmmer einfach gemaach, sech iergendwou doheem ze fillen. Gläichzäiteg gesäit hien dës Erfarungen awer als Virdeel.
Hien huet verschidde Kulture kennegeléiert, schwätzt sechs Sproochen – dorënner fléissend Lëtzebuergesch – an huet geléiert, mat Mënschen aus ganz ënnerschiddlechen Hannergrënn eens ze ginn. Dës Bezéiungen hätten him och gehollef, Traineren a Matspiller besser ze verstoen, um Terrain grad ewéi donieft.
Seng Zäit bei Bayern huet him och d'Méiglechkeet ginn, vun e puer vun de gréissten Nimm am Fussball ze léieren. Wéi hien als 17 Joer ale Spiller mat der éischter Ekipp trainéiert huet, war et virun allem den Arjen Robben, dee bei him Androck hannerlooss huet.
Och um Enn vu senger Karriär wier den Hollänner reegelméisseg zwou Stonne virum Training do gewiescht an hätt nach laang weidergeschafft, nodeems seng Matspiller schonn heemgaange sinn.
Fir de Johansson war et genee dësen Asaz, deen hie beim Robben gesinn huet, aus deem hie besonnesch vill geléiert huet.
Mat just 18 Joer stoung hien an der Allianz Arena an der Finall vun engem Virbereedungsturnéier géint Tottenham um Terrain – en Zeechen, datt Bayern hie potentiell méi no un déi éischt Ekipp erubrénge wollt. Am Kontext vun dësem Match gouf de Johansson awer och vun anere Veräiner kontaktéiert, déi him méi Perspektiven op Asätz an der éischter Ekipp offréiert hunn.
Mat engem schweedesche Papp, enger irescher Mamm an als gebiertege Lëtzebuerger hat de Johansson dräi Länner, tëscht deenen hie fir seng international Karriär wiele konnt. Am Jugendberäich huet hien all dräi Länner representéiert.
Mat 17 Joer huet hie sech schlussendlech fir Irland decidéiert. Hien ass vu Lëtzebuerg bei déi iresch Federatioun gewiesselt a koum an der Qualifikatioun fir d'U21-Europameeschterschaft fir Irland zum Asaz. Vun irescher Säit wier ee reegelméisseg mat him a Kontakt gewiescht an et hätt ee sech och fir seng Entwécklung am Veräin interesséiert.
Scho bei den éischte Frëndschaftsmatcher an Turnéier wier him däitlech gemaach ginn, datt Irland hie wéilt an datt een him och eng Zukunft an der A-Nationalekipp zoutraue géif.
Fir en Teenager war dat eng spannend Perspektiv. "Du hues d'Gefill, et kéint just no uewe goen an näischt kéint dech bremsen oder schifgoen", erënnert sech de Johansson. Och d'Ënnerstëtzung vu sengen Elteren a vu Familljememberen, déi an Irland wunnen, hätte bei senger Decisioun eng wichteg Roll gespillt.
De Wiessel war allerdéngs net einfach. De Johansson huet eng Prozedur bei der FIFA missen duerchlafen – eng Situatioun, déi hien als eng komesch Erfarung esou fréi a senger Karriär beschreift.
"Wann's de esou jonk bass a Fussball spills, wëlls de dech einfach fräi fillen a fir dat Land spillen, fir dat's de spille wëlls. Da gëtt et natierlech ganz schwéier, wann's de dech mat esou Saachen ausernee setze muss", seet hien. Gläichzäiteg versteet hien, firwat et esou Reegele gëtt.
D'Prozedur gouf schlussendlech ofgeschloss an de Johansson konnt seng international Karriär fir Irland weiderféieren.
Wat hien a seng Elteren deemools awer net ganz verstanen haten, war, datt seng Decisioun fir Irland am Jugendberäich e spéidere Retour bei d'Rout Léiwen däitlech méi komplizéiert géif maachen. Hien hätt d'Reegelen anescht verstanen an ugeholl, datt e Spiller nach kéint zeréck wiesselen, soulaang hien net fir d'A-Nationalekipp vun engem anere Land gespillt hätt.
"Meng Elteren an ech, mir woussten net, datt een duerno net méi bei dat ursprénglecht Land zeréck wiesselen dierft", seet hien. "Ech hat ëmmer verstanen, datt d'Reegel esou wier, datt een net méi wiessele kéint, wann ee fir déi éischt Ekipp gespillt hätt."
Eréischt méi spéit wier dem Johansson bewosst ginn, wat fir Konsequenze seng Decisioun mat 17 Joer hat. Haut, mat 25 Joer an no enger Karriär, an där hie vill tëscht Länner a Veräiner ënnerwee war, denkt hien ëmmer méi dacks un d'Méiglechkeet, Lëtzebuerg ze representéieren.
"Ech mengen, Lëtzebuerg wier eng immens flott Optioun, fir Fussball ze spillen", seet hien. "Ech hu ville Leit an och menger Famill gesot, wéi schéin et wier, heemzekommen, op déi Plaz, wou ech gebuer an opgewuess sinn, a Fussball fir dat Land ze spillen."
Trotz de ville Joren am Ausland ass dem Johansson seng Verbindung mat Lëtzebuerg staark bliwwen. Hie kënnt reegelméisseg zeréck, huet Frënn a Famill hei a gesäit Lëtzebuerg weiderhin als seng Heemecht.
De Wonsch, eng Kéier nees fir Lëtzebuerg ze spillen, beschäftegt hien dann och net eréischt zanter kuerzem. Hie géif schonn zanter e puer Joer doriwwer nodenken, och wann hie weess, datt déi aktuell Reegelen engem Wiessel am Wee stinn.
Sollt dës Hürd enges Daags awer kënnen iwwerwonne ginn, misst de Johansson net laang iwwerleeën. Op d'Fro, wat hie géif maachen, wann de Lëtzebuerger Nationaltrainer Jeff Strasser him uruffe géif, fir him matzedeelen, datt d'FIFA de Wiessel erlaabt hätt an hie fir d'Nationalekipp nominéiere wéilt, koum d'Äntwert direkt: "Ech géif wuel muer an de Fliger klammen, wa si muer e Match hätten."
Fir de Johansson gesäit et ënnert den aktuelle FIFA-Reegelen allerdéngs net no engem Retour an d'Lëtzebuerger Nationalekipp aus. Am Prinzip kann e Spiller seng Federatioun nëmmen eng Kéier wiesselen.
Eng Ausnam besteet, wann engem Spiller e Wiessel accordéiert gouf, hien no där Decisioun awer net fir déi nei Federatioun zum Asaz koum. Dat steet am Artikel 10, Paragraph 5, vun de Reegele fir d'Applikatioun vun de FIFA-Statuten.
Op de Johansson trëfft dës Ausnam net zou. Nom Wiessel vu Lëtzebuerg bei Irland huet hie fënnef Matcher fir d'iresch U21-Nationalekipp gespillt.
RTL huet d'Lëtzebuerger Futtballfederatioun FLF zum Fall Johansson kontaktéiert. D'Federatioun huet ausgeschloss, datt hien ënnert den aktuelle Reegelen nach eng Kéier fir Lëtzebuerg spille kann.
Seng Situatioun ënnerscheet sech domat vun där vum Brian Madjo. De 17 Joer ale Spiller huet 2025 dräi Matcher fir déi Lëtzebuerger A-Nationalekipp gespillt. Et waren awer alles Frëndschaftsmatcher, sou datt hien och fir England spillberechtegt bliwwen ass.
Duerno huet hien eng Invitatioun vun der Lëtzebuerger Nationalekipp refuséiert a gouf fir déi englesch U17 nominéiert. En offizielle Match fir eng A-Nationalekipp huet hien awer nach net gespillt.
Déi zwee Fäll sinn net identesch, ma si weisen, wéi wichteg esou Decisioune fir jonk Spiller mat méi wéi enger Nationalitéit kënne sinn. De Johansson seet, datt hien a seng Elteren d'Konsequenze vu senger Decisioun fir Irland mat 17 Joer deemools net ganz verstanen haten.
De Madjo huet en anere Wee ageschloen. Wéi seng international Karriär weidergeet, bleift ofzewaarden. Beim Johansson dogéint sinn d'Konsequenze vu senger Decisioun als Teenager och méi wéi siwe Joer méi spéit nach ëmmer ze spieren.
