Et ass dëst déi éischt Phas vun der Qualifikatioun fir d'Europameeschterschaft 2020. E Freideg wannen d'FLH-Damme mat 27:24 géint Finnland.

Et war eng enk Ufanksphas tëscht béide Formatiounen, wou an den éischte Minutten direkt e puer Mol d'Féierung gewiesselt huet. No knapp enger Véierelsstonn stoung et 10:9 aus der Siicht vun den FLH-Dammen. Dono konnten d'Lëtzebuergerinnen nach direkt zweemol markéieren, fir op 12:9 ze stellen. D'Féierung huet de Lëtzebuergerinne wuel Confiance ginn, well si sinn elo ëmmer méi staark ginn a konnten hir Avance op 5 Goler eropschrauwen. Um Enn vun der 1. Hallschent stoung et 18:13 fir Lëtzebuerg.

Den Ufank vun der zweeter Hallschent huet dann de Finninne gehéiert. Si konnte sech lues awer sécher zeréck an de Match spillen a konnte souguer op 15:18 verkierzen. No 45 Minutte stoung et dunn nach 22:20 fir d'Lëtzebuergerinnen, ma 5 Minutte méi spéit stoung et 22:22 gläich. D'Lëtzebuergerinnen hu sech dunn awer gerappt a sinn zeréck an de Match komm. 3 Minutte viru Schluss ware si nees 2 Goler am Avantage. Zum Schluss konnte se de Match mat 27:24 gewannen.

Trainer zefridde mat Leeschtung a mat Supporter

Den Adrian Stot huet virun allem op eng excellent 1. Halschent vun de roude Léiwinnen insistéiert. Et konnt ee sech am Match ëmmer weider steigeren an dann an der Paus 5 Goler vir ze sinn, muss ee mol maachen. An der zweeter Hallschent konnt ee sech grad op déi gutt Defense an déi ganz staark Golkipperin verloossen.

AUDIO: Extrait Adrian Stot

Impressionnéiert war den Adrian Stot vun der Ënnerstëtzung, op der Plaz, duerch Lëtzebuerger Supporteren. Dat war och flott, datt esou eng Stëmmung opkomm ass. An dofir seet d'Ekipp de Supporter, déi et bal zu engem Heemmatch gemaach hunn, Merci.

AUDIO: Extrait Adrian Stot (2)

Wéi geet et weider?

D'Lëtzebuerger Damme spillen elo nach e Samschdeg um 15 Auer géint Israel an e Sonndeg um 16.30 Auer géint Griicheland.

Déi Ekipp, déi an dëser Grupp op déi éischte Plaz kënnt, qualifizéiert sech fir d'Qualifikatioun vun der Euro 2020 a spillt da géint Holland, Spuenien an Éisträich.