D'Lëtzebuerger Dëschtennis-Spillerin konnt sech an der Véierelsfinall vun den Europaspiller kloer mat 4:1 géint d'Linda Bergström duerchsetzen.

Duerch dës Victoire steet d'Ni Xia Lian elo an der Halleffinall zu Minsk. Si huet der Schwedin, déi an der Weltranglëscht op der Plaz 78 steet, kaum eng Chance gelooss. D'Bergström hat u sech just am 4. Saz eppes entgéintzesetzen an dëse konnt si dunn och fir sech entscheeden.

D'Lëtzebuerger Nummer 1 gewënnt um Enn mat 11:8, 11:7, 11:9, 5:11 an 11:9 a steet elo an der Ronn vun de beschte 4 an huet deemno gutt Chancen op eng Medail. An der Halleffinall kritt d'Lëtzebuergerin et elo mam Fu Yu aus Portugal ze dinn. Géif d'Lëtzebuergerin eng Medail bei den Europaspiller kréien, wier si automatesch fir d'olympesch Spiller zu Tokio am Joer 2020 qualifizéiert.

D'Halleffinall gëtt e Mëttwoch de Moien um 9 Auer gespillt an dës kënnt Dir och live suivéieren op RTL.lu.

E Méindeg hat d'Ni Xia Lian jo ganz iwwerraschend géint d'Nummer 1 aus Europa gewonnen a sech esou fir dës Véierelsfinall qualifizéiert.