No hirer exzellenter 5. Plaz um K1 Premier League zu Tokio vu virun 2 Wochen huet d'Lëtzebuergerin hir gutt Form nees ënner Beweis gestallt ...

... déi Kéier bei de Karate K1 Series A am Chile.

D'Jenny Warling huet sech do e Freideg bis an d'Véirelsfinall vir gekämpft an huet e Sonndeg am Repêchage nach d'Méiglechkeet op d'Bronzemedail. No hirer exzellenter 5. Plaz um K1 Premier League zu Tokio virun 2 Wochen huet d'Lëtzebuergerin eng weider Kéier bewisen, datt si gutt a Form ass.

Um Wee fir ënnert déi bescht 8 huet sech d'Jenny Warling ënner anerem 3:2 géint d'Tuba Yakan, d'Nummer 3 aus der Weltranglëscht, duerchgesat. An der Véirelsfinall koum d'Géignerin aus Brasilien: D'Valeria Kumizaki huet de leschte Mount Panamerican Games zu Lima gewonnen an huet och soss zënter Joeren en uerdentleche Palmarès virzeweisen. Déi aktuell Europameeschterin ass net optimal mam Kampfstil vun der Brasilianerin zerechtkoum an huet sech um Enn misse knapp mat 1:2 geschloe ginn.

Well d'Kumizaki d'Halleffinall géint d'Sara Cardin aus Italien awer fir sech entscheede konnt, ass d'Jenny Warling repêchéiert ginn a kämpft e Sonndeg géint d'Gewënnerin vum Duell Korea - Schwäiz.

Am decisive Match e Sonndeg fir d'Bronzemedail huet eng staark Géignerin gewaart: d'Sara Cardin, d'Weltrangnummer 10 aus Italien. D'Jenny Warling huet Rou behalen an zum richtege Moment markéiert. Nodeems d'Italienerin nach eng Kéier ausgeglach huet, ass et der Lëtzebuergerin gelongen, an der Schlussphas den entscheedende Punkt zum 2:1 ze markéieren an domat Bronzen ze gewannen.

D'Jenny Warling huet sech mat dëser staarker Leeschtung an der Weltranglëscht e puer Plazen no vir geschafft. D'Qualifikatioun fir Olmypia huet d'Lëtzebuergerin awer nach net gepackt. Ma an den nächste Woche stinn awer nach eng Rëtsch Qualifikatiouns-Tournoien um Programm - Tokio 2020 bleift deemno méiglech. Géif d'Jenny Warling op dësem Wee sech fir Olympia net qualifizéiere kënnen, hätt d'Lëtzebuergesch Karateka am Mee bei engem Qualifikatiouns-Tournoi nach d'Chance op Tokio.