Fir den 2. Tour vum Challenge Cup ass Käerjeng a Schweden gereest, Diddeleng huet Dobele aus Lettland op Besuch. Am EHF Cup goung et fir Esch a Polen.

2. Tour Challenge Cup

HB Diddeleng - Dobele 24:27 (10:11)

Eng ganz ausgeglache Partie hunn d'Spectateuren e Samschdeg den Owend zu Diddeleng an der Hal mat erlieft. D'Ekipp aus der Forge du Sud huet an den Ufanksminutte gutt matgehalen, ass awer op 4 Goler a Réckstand geroden. Kuerz virun der Paus huet den HBD sech nees gefaangen an ass op 1 Gol erukomm: 11:10 fir d'Letten an der Paus. D'Letten hunn dunn och déi 2. Hallschecht besser ugefaangen. Si konnte virun allem op eng staark Leeschtung vun hirem Kipper bauen, deen den Diddelenger et schwéier gemaach huet. No enger couragéierter Partie vum HDB hu sech d'Jongen aus der Forge du Sud sech awer misse mat 24:27 geschloe ginn.

D'Lette waren insgesamt déi méi zolidd Ekipp an haten déi besser Defense. Beschte Buteur bei den Diddelenger war den Armin Zekan mat 7 Goler.

Den HB Diddeleng verléiert géint Dobele
Di Diddelenger hu mat 3 Goaler Ecart géint Dobele aus Lettland verluer. Fir de Retourmatch dee nächste Samschdeg ass awer bestëmmt nach eppes dran.

Alignsas - HB Käerjeng 36:24 (13:10)

HB Käerjeng hat fir den 2. Tour am Challenge Cup ee schwéiere Géigner virun der Broscht: et goung géint d'Schweden vun Alignsas. Direkt vun Ufank un huet d'Heemekipp versicht de Stempel op d'Partie ze drécken an esou haten Schweden séier ee Lach vu 5-6 Goler. D'Ekipp aus der Brauereistad huet sech awer net esou séier geschloe ginn a koum an der Paus beim Stand vun 13:10 op 3 Goler zeréck. An den zweeten 30 Minutten huet Alignsas awer nees opgedréint. Ervirzehiewen ass dem Benjamin Helander säin Leeschtung bei de Schweden. Ënnert sengem Impuls huet HK Alingsas verdéngt géint den HB Käerjeng gewonnen.

2. Tour EHF Cup

Pulawy - HB Esch 31:28 (16:14)

A Polen beim KS Azoty-Pulawy huet den HB Esch vun Ufank u gutt dogéint gehalen. Bis de 14:14 kuerz virun der Paus war et ee ganz ausgeglachener Match, ma no der éischter hallwer Stonn war d'Heemekipp mat 16:14 a Féierung. No der Paus war et weider ee ganz spannende Match - Goler sinn op béide Säite gefall. Beim Stand vun 20:20 huet d'Lokalekipp ugezunn a sech ee Lach vun e puer Goler erausgespillt. Um Enn war et eng 28:31-Néierlag fir d'Jongen aus der Minett-Metropol, déi wärend dem Match insgesamt fënnefmol an Ënnerzuele waren.