An der 1/8 -Finall vun der Coupe de Luxembourg huet den HB Mersch géint den HB Bartreng mat 24:17 gewonnen. De HC Standard verléiert mat 25:39.

E Sonnden war et d'Suite vun den 1/8-Finall Matcher am Hären Handball. Iwwerraschungen sinn aus bliwwen. Miersch ka sech géint Bartreng a Diddeleng géint de Standard duerchsetzen.

E Samschdeg schonns hate sech bei den Hären den HB Käerjeng, den HB Museldall, den HC Bierchem an de HB Péiteng duerchgesat.

HC Standard - HB Diddeleng 25:39

E ganz ausgeglache Match hunn d'Spectateuren an der éischter Halschent gesinn. Den HC Standard louch no 8. Minutte mat 10:8 vir. Lues awer sécher ass de Favorit vun Diddeleng besser an de Match komm an an der Halschent louche si dann och mat 3 Punkten a Féierung. 17:14 stoung et no 30 Minutten.

De Standard huet an der 2. Halschent alles versicht, ma sollt et um Ënn awer net méi duergoen. Obwuel d'Lokalekipp no 40 Minutte nach ëmmer just 4 Goler Réckstand hat, huet hinnen an der leschter Véierelstonn d'Kraaft gefeelt. Dem Standard ass an deene läschte 5 Minutte kee Gol méi gelongen. 25:39 verléiert de Standard. Diddeleng steet domatt an der 1/4-Finall vun der Coupe.

HB Miersch 75 - HB Bartreng 24:17
Zu Miersch an der Sportshal koum et e Sonndeg den Owend an der Coupe am Handball zum Duell tëscht dem HB Miersch a dem HB Bartreng. No enger ausgeglachener Ufanksphas, wou et 5:5 stoung, ass den Haushären ee 7:0-Laf gelongen, esou dass si no knapp 20 Minutte mat 12:5 am Avantage waren. Déi lescht 10 Minutte vun der éischter Hallschent waren nees méi ausgeglach an esou goung et beim Stand vu 16:9 fir d‘Lokalekipp an d‘Paus.

D‘zweet Hallschent war nach net laang am Gaangen, wéi de Match op eemol méi aggressiv ginn ass. Nodeems schonns an der éischter Hallschent 2 Mierscher Spiller blesséiert vum Terrain hu misse goen, hat et an der zweeter Hallschent ee weidere Mierscher getraff. An der Suite krut de Bartrenger Golkipp Rout, ee weidere Golkipp vun de Gäscht eng 2-Minutte-Strof. Sou huet den 3. Golkipp missen asprangen. Miersch an Iwwerzuel huet de Kommando iwwerholl a 15 Minutte virum Enn vum Match stoung et 20:12 fir d‘Lokalformatioun. Déi lescht Véierelstonn vun der Partie war ee gutt Stéck manner spektakulär, Miersch wollt d‘Avance elo einfach iwwer d‘Zäit bréngen a sech esou fir den nächsten Tour qualifizéieren. Dëst ass hinnen um Enn och duerch eng 24:17-Victoire gelongen.

CHEV Dikrech - HB Käerjéng 24:31

Béid Ekippen sinn de Match ganz konzentréiert ugaangen an et huet ee gemierkt, dass ee gewëllt ass, an déi nächste Ronn ze kommen. No 17. Minutte stoung et dann och 8:9. Dunn huet Käerjeng den Tempo awer däitlech erhéicht an den Auger am Gol vum HB huet mat excellente Paraden e groussen Undeel dodru gehat, dass déi Käerjenger tëscht der 17. an der 24. Minutt e 5:0 geschoss hunn. No 23 Minutte louchen déi Dikrecher doheem deemno mat 8:14 a Réckstand. Bis d'Paus sollt sech net méi all ze vill änneren, an et ass aus Dikrecher Siicht mat engem 11:18 an d'Kabinne gaangen.

No der Paus huet de CHEV nach eng Kéier alles versicht an direkt 2 Goler geschoss. D'Käerjenger Léiwen hu sech awer net beandrocke gelooss an hunn hirersäits duerch eng gutt Offensive deen ale Virsprong erëm hirgestallt. Dikrech huet awer net opginn, huet weider säin Handball gespillt, an ass duerch e staarke Golkipp nees zeréck an de Match komm. No 50 Minutten hat d'Lokalekipp nëmmen nach 3 Goler Réckstand. 22:25. An enger hektescher Schlussphas ass et hin an hier gaangen, ma déi Käerjenger hu sech schlussendlech virun allem duerch eng super Leeschtung vum Chris Auger, dee ganzer 22 Paraden ze verbuchen hat, mat 31:24 zu Dikrech duerchgesat. Domatt steet den HB Käerjeng an der 1/4-Finall.

HB Museldall (+3) - HBC Schëffléng 30:29
Iwwerraschung op der Musel. D'Ekipp aus der Promotioun A, déi mat 3 Goler Avance an de Match gaange sinn, louchen an der Paus mat 18:13 fir. Et war eng ganz hektesch Schlussphase, wou déi Schëfflenger no an no de Réckstand verklengert hunn. Um Enn sollt et awer net méi duergoen fir d'Ekipp aus der AXA League. De HB Museldall konnt sech iwwerraschend mat 30:29 géint de Favorit vu Schëffleng duerchsetzen. Domatt steet d'Ekipp vun der Musel an der 1/4-Finall.

HC Réiden (+3) - HC Bierchem 19:48
Fir Bierchem gouf et déi erwaarte kloer Victoire géint Réiden aus der Promotioun A. D'Ekipp aus der Axa League huet sech mat 48:19 bei deene Réidener duerchgesat.

Esp. Rëmeleng (+3) - HB Péiteng 30:32