De Weekend huet d'Lëtzebuerger Badminton-Federatioun an der Coque déi 15. Editioun vum internationale Jugendturnéier "Youngsters" organiséiert.

Am Ganze waren de Weekend iwwer 243 Spiller a Spillerinnen an der Coque am Asaz. Bei den U13-Meedercher huet d'Mara Hanfer fir eng lëtzebuerger Victoire gesuergt. Bei den U15-Jonge war et déi 2. Plaz fir de William Wang.

Da stoungen och nach d'Shana Pauquet mat hirer schwäizer Partnerin an d'Koppel Léa Genson/Maira Zieser bei den U19 am Dubbel um Podium.

Schreiwes vun der Feluba

Mara Hafner wënnt den “Youngsters” bei de Meedercher U13, William Wang 2ten bei de Jongen U15
De leschte Weekend gouf an der Coque um Kierchbierg fir déi 15. Kéier den Internationale Jugendturnéier “Youngsters” vun der Lëtzebuerger Badminton Federatioun organiséiert.

243 Spillerinnen a Spiller hunn sech an 20 verschidde Kategorien, vun U11 bis U19, Eenzel an Doubel, gemooss an no Ronn 600 Matcher stoungen och 2 Sportler aus dem Lëtzebuerger Kader an de respektive Finalen.

D’Mara Hafner huet an engem ganz spannende Match iwwert 3 Sätz sech duerchgesat kritt an esou d’Kategorie Meedecher U13 gewonnen.

De Willam Wang sengersäits huet d’Final knapp an 3 Sätz verluer an huet sech eng remarkabel 2. Platz an der Kategorie Jongen U15 erkämpft.

Iwwert e weidere Podium fir Lëtzebuerg konnten d’Shana Pauquet (mat enger Schwäizer Partnerin) an d’Koppel Léa Genson / Maira Zieser bei de Meedercher Doubel U19 feieren.

All d’Resultater sinn op tournamentsoftware.com ze fannen.

No engem gelongene Weekend freeë mir eis schonn op déi nächst Editioun 2020.