Dës Decisioun ass en Dënschdeg de Mëtteg och an der Videokonferenz mat hire 55 Membere confirméiert ginn.

D’UEFA huet en Dënschdeg de Mëtten an enger Videokonferenz d'Decisioun geholl, d’Europameeschterschaft am Futtball an de Summer 2021 ze verleeën. Déi national Verbänn an d’Europäesch Club Associatioun (ECA) hunn dës Decisioun ugeholl.

Futtball-EM verluecht / Reportage Franky Hippert

Et gëtt also kee grousst Futtballsfest duerch Europa. An 12 Länner sollt vu Mëtt Juni bis Mëtt Juli de Ball rullen. En Dënschdeg de Mëtteg gouf elo decidéiert d'Futtball-EM ëm ee Joer ze verréckelen, erkläert de President vun der Lëtzebuerger Fussballfederatioun Paul Philipp.

Jo an enger alleréischter Phas hoffe mer elo emol, net méi iwwer Futtball mussen ze schwätzen. Des Decisioun huet awer misse geholl ginn, fir ze wëssen, wou een drun ass. Lo ass et wichteg sech ze schützen. Et ass déi Decisioun, déi ze erwaarde war, fir d'EM ëm 1 Joer ze verréckelen.

Domat ass och Russland aus der Course, déi asprange wollten, falls duerch Europa net kéint gespillt ginn.

Dëst ass eng Première an der Geschicht vun der UEFA, déi zanter der Grënnung am Joer 1954, fir déi éischte Kéier eng Europameeschterschaft verleeë muss.

Et ass och nach net bekannt, op d'EM am Summer 2021 ënnert dem selwechte Format ka gespillt ginn. Den Datum steet awer, se ass vum 11. Juni bis den 11. Juli. mDen Haaptgrond ass, fir elo ze probéieren, wann déi ganz Situatioun mam Coronavirus sech berouegt huet, d'Clubkompetitioun fäerdeg ze spillen:

Jo, dat ass och déi eenzeg Ursaach gewiescht, fir datt all d'Federatioun hir Kompetitioune fäerdeg kënne spillen. Elo ass déi Plage geschaf ginn, fir bis Enn Juni kënnen ze spillen. Wéini awer nees gespillt ka ginn, weess kee Mënsch.

De FIFA-President Gianni Infantino huet akzeptéiert, datt d'Europameeschterschaft an d'Copa America an de Summer 2021 verluecht goufen. Doduerch muss dann awer d'Klub-WM vun der FIFA verréckelt ginn. Déi wär eventuell dann Enn 2021, oder esouguer 2022 oder esouguer 2023, esou de President vun der Internationaler Futtballfederatioun.

Futtball-EM verluecht (2)/ Reportage Franky Hippert