Am nationalen Handball-Championnat war et en Donneschdeg den Owend d'Suite vum 4. Spilldag. Um Programm stoungen zwou Partien.

Als klore Favorit ass den Handball Esch bei den Noper op Rëmeleng gereest an huet dat vun Ufank u gewisen. Direkt mat engem 4:0 hunn d'Gäscht lassgeluecht éier den Dian fir déi éischte Kéier fir d'Esperence markéiert huet. Esch konnt och dono weider den Ecart ausbauen an ass mat engem Avantage vun 12 Punkten (24:12) an d'Paus gaangen. Nom Säitewiessel gouf et méi hektesch an déi Rëmelenger hunn tëscht der 35. an 41. Minutt direkt 4 Mol 2 Minutte kritt. Fir den Dian war et dann och seng drëtt an hie gouf vum Terrain gestallt. Ma och déi Escher haten an där Zäit eng schlecht Phas erwëscht a krute véier Leit an net emol 2 Minutte vum Terrain gesat. D'Situatioun huet sech dono e bësse berouegt, ma déi Escher konnten hiren Ecart weider ausbauen an hunn zum Schluss kloer mat 39:22 gewonnen.

Am anere Match vum Donneschdeg hat Miersch Besuch vu Schëffleng kritt. Hei hat d'Heemekipp de bessere Start an hat laang eng Avance vun 3 bis 4 Goler, déi si dunn awer an der Paus op 6 (19:13) konnten eropschrauwen. Nom Säitewiessel huet Miersch et laang fäerdegbruecht, den Ecart op tëscht 5 a 7 Goler ze halen, esou datt Schëffleng sech ni wierklech zeréckkämpfe konnt. Um Enn verléieren déi Schëfflenger mat 28 op 33. Miersch wënnt domadder schonn den zweete Match an dëser jonker Saison, Schëffleng muss, wéi och Rëmeleng an Dikrech, nach ëmmer op eng Victoire waarden.

RTL

© Serge Olmo

Am Spëtzematch war Käerjeng op Besuch zu Diddeleng. An engem immens spannendem an intensivem Match war et d'Lokalekipp, déi an der Paus mat 19:15 a Féierung louch. An deenen zweeten 30 Minutten huet Käerjeng sech Gol fir Gol eru gekämpft, an esou ware si 20 Minutte viru Schluss mat 2 Goler am Réckstand. Dono gouf et eng Phas am Match an där de Salih Radoncic an den Elledy Semedo op Säite vu Käerjeng, wéi och de Frank Hippert vun Diddeleng mat enger rouder Kaart disqualifizéiert gi sinn. Käerjeng ass an der Suite bis op 1 Gol erukomm, fir e Gläichspill ass et awer net méi duergaangen, sou dass Diddeleng mat 29:28 gewënnt.

Diddeleng gewënnt géint Käerjeng / Rep. Serge Olmo

Am zweete Match gouf et eng däitlech Victoire vu Bierchem doheem géint de CHEV Dikrech. D'Réiserbänner kënne sech mat 32:19 behaapten.

En Dënschdeg den Owend hat de Standard scho kloer géint d'Red Boys verluer. Nodeems d'Lokalekipp no 30 Minutte mat 9:16 hanne louch, huet ee sech misse mat 14:31 geschloe ginn.

Den Iwwerbléck vun de Resultater

D'Tabell