Dës Woch feiert d'FLH de 75 Gebuertsdag. An deem Kader ass ënner anerem e Freideg ee Galamatch tëscht Däitschland a Portugal.

Um Mëttwoch den Owend huet déi Lëtzebuerger Nationalekipp an engem Frëndschaftsmatch géint de Portugal gespillt an huet däitlech 21:39 verluer an dat zu Krautem viru ronn 300 Spectateuren.

D’Gäscht gehéieren zu den europäeschen Topp-Ekippen an et war logesch, datt et eng Defaite géif gi fir d’FLH-Selektioun.

Et ass vill Potential am Lëtzebuerger Kader, allerdéngs musse sech d’Spiller, déi am Ufank vun hirer Preparatioun sinn, emol nach fannen. Munch Lëtzebuerger sinn och fir d’éischt am Trainer Nikola Malesevic sengem Kader.

Den Nationaltrainer huet vill ausgewiesselt an huet e puer taktesch Varianten ausprobéiert. An der Paus war de Favorit 19:10 vir. De beschte Lëtzebuerger Marqueur war no de 60 Minutten den Dan Scheid mat 4 Goler.

D’Lëtzebuerger spillen um Freideg an um Samschdeg géint d’USA zwee weider Frëndschaftsmatcher. An deene Partië kann ee mat enger Victoire rechnen.

D’Rout Léiwe preparéiere sech op d‘WM- an d’EM-Qualifikatioun am Januar.

Bei de Portugise steet um Freideg an der Arena vun der Coque de Galamatch géint Däitschland un. Esouwuel eisen Noper wéi Portugal preparéieren hir EM, déi am Januar gespillt gëtt.