Bei den Dammen hat de Leader T71 keng Problemer mam Opsteiger Wolz.

Resumé Basket / Reportage Guy Seyler

Am Basket war et e Samschdeg d'Suite vum 15. Spilldag am Championnat. An enger enker Partie huet sech bei den Hären d'Etzella an der Fiels mat 86:82 (21:12, 18:19, 19:20, 28:31) duerchgesat. Bei der Arantia war den Derek Wilson mat 27 Punkten de beschte Scorer, op Säite vun der Etzella war dat de Criston Lamar Mallory mat 26 Punkten.

Bei der Etzella stoung mam Raul Birenbaum een neit Gesiicht um Terrain. No senger laanger Verletzungspaus ass hien nees zeréck um Parquet an dat fir een neie Veräin.

Keng Problemer haten dann d'Musel Pikes beim Racing. Déi Miseler louchen an der Paus mat 49:32 a Féierung an hu sech um Enn kloer mat 96:77 (23:13, 26:19, 21:25, 26:20) duerchgesat.

Am drëtte Match vum Owend huet sech Hiefenech géint den Telstar mat 79:67 (19:10, 26:26, 17:14, 17:17) behaapt.

E Freideg hat sech Bartreng scho géint de Champion Diddeleng behaapt. De Lavone Holland hat spektakulär a leschter Sekonn vun der Mëtt aus fir d'Sparta getraff an esou fir d'91:90-Victoire gesuergt.

Dammen

Um Sonndeg war bei den Dammen de Match Etzella géint d'Musel Pikes, d'Partie vun der Résidence Walfer géint den AB Conter gouf Corona-bedéngt verluecht. D'Musel Pikes gewannen an der Däichhal kloer mat 87:64 (25:18, 25:14, 19:10, 18:22) géint d'Ettelbréckerinnen a klammen domat op déi zweete Plaz an der provisorescher Tabell. D'Miseler, wou d'Mikayla Ferenz mat 29 an d'Bridget Yoerger mat 21 Punkte bescht Scorerinne waren, hunn déi dräi éischt Véierele fir sech entscheet, d'Etzella konnt sech am leschte Véierel nach e bëssen erëmkafen an de Score e bësse verkierzen. Op der Säit vun Ettelbréck hunn d'Donasja Teree Scott (21 Punkten), d'Cori Coleman (17 Punkten) an d'Jovana Jaksic (15 Punkten) déi meescht Punkte markéiert.

Bei den Damme war Corona-bedéngt e Samschdeg den Owend nëmmen eng Partie. Fir den T71 gouf et eng weider Victoire an dëser Saison. D'Damme vun Diddeleng hu sech mat 91:68 géint den Opsteiger Wolz duerchgesat.